IA aamma Alternativet illersornissaq pillugu oqallitsitsiniartut
Inuit Ataqatigiit Folketingimi allaffeqarfia tusagassiorfinnut nalunaaruteqarluni taama ilisimatitsivoq.
Illersorneq pillugu isumaqatigiissutissaq nutaaq Folketingimi partiit ukiaru naammassillugu isumaqatigiinniutigissavaat. Kunngeqarfiup illersorneqarneranut naalagaaffikukiuni aggersuni aningaasanik qanoq amerlatigisunik atuissanersoq aningaasallu qanoq agguataarneqassanersut isumaqatigiissummi sinaakkuserneqassaaq.
Tamannalu nunatsinni innuttaasut sunniuteqaqataaffigisariaqaraat Inuit Ataqatigiit Folketingimi isumaqarput, namminnerlu illersornermut politikki pillugu saqqummiussassaminnik suliaqarlutik.
- Innuttaasunik oqaloqateqarnernit immersuutit illersornermut politikki pillugu saqqummiussassamut qitiutinneqassapput. Saqqummiussassaq tigussaasunik siunnersuutitaqassaaq, kalaallit politikkissami qanoq akuutinneqarsinnaanerat aammalu taassuma sutigut Kalaallit Nunaannut iluaqutissiisinnaanera pillugit, Inuit Ataqatigiit tusagassiorfinnut nalunaarummi taama allapput.
Inuit Ataqatigiit Alternativetilu illersornissamut politikki pillugu oqallitsitsinissamut Nuummi Katuami sisamanngornermi apriilip 20-iani nal. 16-19 qaaqqusipput. Aamma Sisimiuni assingusumik maajip qaammataani ataatsimiititsisoqassasoq, Inuit Ataqatigiit ilisimatitsissutigaat.
Politikerillu saniatigut aamma Rasmus Leander Nielsen Ilisimatusarfimmeersoq, Nils Westergaard Issittumi Sakkutooqarfimmeersosq Bjørn Tegner Bayilu Nunatta Politiivineersoq oqallitsitsinermi peqataassapput.
Danskit illersornissamut ministeriata Claus Hjort Frederiksenip (V) illersornissaq pillugu isumaqatigiinniarnissamut atatillugu kalaallit savalimmiormiullu Folketingimut ilaasortaatitaasa tusarniarneqarnissaat kissaatigalugu nalunaarutigisimavaa.
Illersornissaq pillugu isumaqatigiissummi maanna atuuttumi, kalaallit partiivisa peqataaffiginngisaanni, Illersornissamut qullersaqarfiup Issittumi suliassaanut ukiumut 120 millionit koruunit immikkoortinneqartarnissaat 2016-imi akuersissutigineqarpoq.
