Qimmillit akiuussummik kapisinissaq soqutiginngilaat

Qimmillimmi ikittuinnaat qimmip akiuussutissamik kapitinnissaa 120 koruniinik akilik aningaasartuutigisarpaat. 

Qeqertami tuniluuttoqarnerata kingorna qimmit akiuussutissamik kapitinnissaat qimmilinnit soqutigineqalersimanngitsoq, Qaasuitsup Kommuniani uumasut nakorsaanera Sanne Eline Wennerberg oqarpoq.

- Tupigusuutigingaagarali aajuna Qeqertami tuniluuttoqarujussuarnera tusagassiortunit nunatsinnilu sumiiffinni assigiinngitsuni eqqartugaangaatsiaraluartoq Ilulissani qimmilinnit pingasuinnarnit saaffigineqarpunga, suleqatikkalu allat saaffigineqarsimanngiivillutik, Sanne Eline Wennerberg oqarpoq.

Aamma atuaruk KNQK: Qimussertarneq attatiinnarusupparput

Nunaqarfimmi qimmit 300-niit 100-t missaanut apparsimasut, Qeqertami qimussertartut kattuffianni, Tiiarut 91-imi siulittaasoq, Anina Nielsen, ippassigami oqaluttuarpoq.

Tuniluunneq tusagassiuutitigut malinnaaffigineqaraluartoq qimmit kapitinnissaannik soqutiginnittoqalersimanngilaq. 

- Tuniluunneq qanoq ajortiginera taama eqqartugaatigisoq qimmillit amerlanerusut akiuussutissamut kapisinissat suut pisariaqartinneqarnersut apersuutiginngikkaat tupigusuutigaara, Sanne Eline Wennerberg oqarpoq.

Uumasunut nakorsap misigaa, soorluuna utaqqiinnartutut ajussanngitsoq neriullutik.

- Uggornarluinnarpoq, taamaattussaannginnamimi. Qimmeq nappaamik eqqugaaguni toqussaaq. Tassa taamaappoq. Akiuussutissaq nakorsaataanani pinaveersaartitsisuuvoq, Sanne Eline Wennerberg oqarpoq.

Aamma atuaruk Qimmit Ilulissaneersut peqataasinnaajunnaarput

Aamma atuaruk VIDEO Qimmit nappaataat Ilulissani tuniluutilertorpasittoq

Aamma atuaruk Qimmit nappaataata Ilulissanut anngussimanissaa aarleqqutigineqartoq