Qeqqata meerartai hashimik atornerluinermit eqqugaaqqasut
Naalagaaffiit Peqatigiit Meeqqat pillugit isumaqatigiissutaanni immikkoortoq 33 naapertorlugu meeqqat ikiaroornartunut sunulluunniit, ilaatigut hashimut, illersugaassapput. Meeqqalli illersorneqarnissaminnut pisinnaatitaaffeqarnerat Nunatsinni malinneqanngilaq.
Tamannalu Qeqqata Kommunianut aamma atuuttoq, nalunaarusiami kommunimi illoqarfinni nunaqarfinnilu maluginiakkat aammalu innuttaasunik inunnillu ilisimasalinnik oqaloqateqarnerit tunngavigalugit MIO-mit suliarineqartumi tamanna atuarneqarsinnaavoq.
MIO-p nalunaarusiaa naapertorlugu hashimik atuineq annertuupilussuuvoq. Hasheerniarneq inuit ilaannut aalajangersimasumik aningaasarsiutaavoq aamma meeqqat najuutsillugit inersimasut ikiaroortarput.
Tamannalu meeqqanut kingunerlutsitsisarpoq:
- Arlalitsigut oqaluttuarineqarpoq, inuit ikiaroornartumik kingunerlutsitsisut meeqqanut ilaquttaminnullu allanut sakkortuuliortartut, nalunaarusiami taama allassimavoq.
Nukappiaraq 15-inik ukiulik nalunaarusiami ilaatigut ima oqarpoq:
- Angerlarsimaffik toqqissisimasoq, angajoqqaat hashitorfiginagulu imerpallaarfigisanngisaat, ikioqatigiiffiusoq pingaarnerpaatullu asanninneqarfiusoq.
AAMMA ATUARUK MIO-p nalunaarusiaa nikallornartortaqarpoq
Sulisut oqaluttuaraat angajoqqaat atornerluineq pissutigalugu meeqqamik akisussaaffiginissaannut nukissaqanngitsut. Meeqqat atuanngitsoortarput imaluunniit iluamik nerissanatik.
MIO-p inassutigaa meeqqat illersugaanissaat qulakkeerniarlugu meeqqat namminneq peqataaffigisaannik suliniuteqartoqassasoq. Aamma kommunip susassaqarfiit akimorlugit aanngajaarniutinik pinaveersaartitsinermik paasititsiniaanermillu suliaqartussamik suleqatigiissitaliornissaa inassutigineqarpoq.
MIO-p aamma erseqqissaatigaa Ilaqutariinnik sulissiviit meeqqanut angajoqqaanullu suliniutaat iluaqutaasutut isikkoqartut. Taamaammat Ilaqutariinnik sulissiviit sulinerat tapersersorneqassasoq MIO-p kaammattuutigaa.
