MIO-p tikeraarnera Qeqqata Kommunianut 49-nik nalunaaruteqartitsisoq

MIO-p meeqqallu illersuisuata Aviaja Egede Lyngep Qeqqata Kommuniamut angalanermit nalunaarusiaq ataasinngornermi ualikkut saqqummiuppaat. Nalunaarusiaq MIO-p nalunaarusiaata sisamaraa, nalunaarusiallu pingasut assigalugit alianartumik atuagassartaqarpoq.

Nalunaarusiaq angalanerminni meeqqat inersimasullu saaffiginnissuteqartut oqaloqatigisatit tunngavigalugit allanneqarpoq.

MIO-p meeqqanik oqaloqatiginninnerani oqaatigineqartut ilaat isumakulunnangaarmata suliat kommunimut nalunaarutigai.

- Meeqqat Illersuisuat, (...) suliat 49-t meeqqanut 56-inut tunngasut nalunaarutigaat. Taakkunannga marluk politiinut toqqaannartumik nalunaarutigineqarput, MIO Qeqqata Kommunianut angalanerminit nalunaarusiamini allappoq.

AAMMA ATUARUK Hashi ikiorneqannginnerlu Qeqqata Kommuniani meeqqanut atugarliortitsisut

MIO-p nalunaarusiaani niviarsiaraq ilaquttaminit kinguaassiutitigut kannguttaatsuliorfigineqarnerminik oqaluttuarsimasoq, ilaqutaasorli eqqartuussivimmi pinngitsuutinneqartoq ilaatigut atuarneqarsinnaavoq.

Niviarsiaraq taanna nakorsamit misissorneqarsimanngilaq, ikiorneqarusunnerminillu ikiorneqarsimanani. MIO-p niviarsiaraq isumakuluutigisani akuersiteriarlugu kommuni nalunaaruteqarfigaa.

Saaffiginninnerit 200-init amerlanerusut

Meeqqat inersimasullu saaffiginnissuteqarfigisaanni meeqqat illersuisuat, siunnersorti aamma meeqqanut siunnersorti Qeqqata Kommuniani Atammimmut, Napasumut, Maniitsumut, Kangaamiunut, Sisimiunut, Sarfannguanut, Itillimut tikeraarput.

MIO-p ulluni 14-ini angalanerani meeqqat 168-it inersimasullu 128-t saaffiginnipput.