ASSIT Halibut Greenlandip avaleraarsartoorniutaani suleruluttut

Kilisaat imartami Tunup Islandillu akornanniittumi avaleraasartoorniarpoq. Inuttat 86-iupput, taakkunannga arfinillit Nunatsinneersullutik. Kalaallip inuttaasimasup ilaata ikissalluni aqquterujussuaq aqqutigereerlugu Afrikap avannaata kitaani Gran Canariami ikigami siumukkani ima oqaluttuarai:

- Ikigatta assorujussuaq ingerlaannaq avaanngusulereerluta. Inissatsinnut isileriallaratta maajunnangaarami asanneqarsimanngitsoq suneqarsimanngitsoq. Tassanngaanniit tujormineq aallartippoq. Iluamik nerisaqarneq-ajorpugut, suleruluttarpugut, kilisaammi Aleksandr Mironenkomi inuttaasimasoq oqarpoq nangillunilu:

- Inuttat aalakoortarput. Maangaannaq fabrikkimut quisarput, qisertarput, asaaneq-ajorput. Tipittorujussuuvoq peqqinnarnani suliffittut, inuttaasimasoq oqarpoq.

Halibut Greenlandip akisussaaffiginngilai
Halibut Greenlandimi pisortap tullersortaata, Erik Sivertsenip, kilisaammi inuttat taamatut atugaqartinneqarnerannik tusagaqarsimannginnerarpoq.

- Uanga taanna paasissutissaq aatsaat tusarpara. Uannut anngunneqarnikuunngilaq, Erik Sivertsen oqarpoq.

Kilisaammili inuttat, inuttamit tusarfitsinnit oqaatigineqartutut atuagaqartinneqarsimappata, tamanna Halibut Greenlandip akisussaaffiginngikkaa, Halibut Greenlandimi pisortap tulliata erseqqissarpaa:

- Ulluinnarni ingerlatsineq, umiarsuup iluani pisut, tunisassiornermullu attuumassuteqartut russit 100 %-imik akisussaaffigaat.