GE: Tuluit Nunaata nalunaaruteqarnera sakkortuvoq
Tuluit nunaata europamiut peqatigiiffiannit aninerata kingorna Naalakkersuisut Danmark suleqatigalugu ajunnginnerpaamik brexit atortariaqarpaat. Sulisitsisut peqatigiiffiat taama isumaqarpoq.
- Tuluit nunaat isumaqatigiinniarniarluni sakkortusaarluni aallartippoq, siunnersuutaannartulli taamaaliornerat uanga isigaara, Sulisitsisut peqatigiiffianni siulittaasoq Brian Buus Pedersen oqarpoq.
Nunanut allanut tunngasunut naalakkersuisoq Vittus Qujaukitsoq isumaqatigaa oqarmat isumaqatigiinniarnerit artornarlutillu ajornakusoorumaartut, Tuluit nunaata nunatut EU-mit anisutut inatsisini immikkoortortaq 50 atuutsilerpagu.
Ilutigitilluguli isumaqatigiinniarnissat Kalaallit Nunaannut pingaaruteqassaqisut unnerpoq, Tuluit nunaammi kalaallit tunisassiaataannik annertoqisumik niuerfiuvoq.
- Naalakkersuisut danskillu naalakkersuisui kajumissaassavagut EU-mi suliamut sapinngisartik tamaat sunniuteqarniaqqullugit, kalaallit soqutigisaat ajunnginnerpaamik suliarineqarniassammata, Brian Buus taama oqarpoq ikiuukkusunninilu neqeroorutigalugu.
- Aalisarnermik soqutigisaqaqatigiittut uagut aamma naalakkersuisut oqaloqatigerusuppagut, taamaalilluta isumaqatigiinniarnerit killiffii malinnaaffigisarniassagatsigit, pitsaanerpaanik angusaqarnissaq siunertaralugu.
AAMMA ATUARUK Brexit uatsinnut sunniuteqanngitsoornavianngilaq
Apeqqut nunatsinnut aalajangiisussaq tassaavoq, nunarput nammineerluni Tuluit Nunaannut isumaqatigiissusiorniassanersoq imaluunniit Tuluit Nunaata EU-llu isumaqatigiiniarnissaanni Danmarkimut EU-mullu sunniiniassanersoq.
Qujaukitsoq naapertorlugu suleriaatsit atatsikkoortillugit atorneqassapput:
- Apeqqutaasorujussuussooq soorunami uagut nunatut nammineq Tuluit Nunaannut attaveqaatitta sapinngisamik pitsaanerpaaffianiitinnissa qulakkeerniassallugu.
Tassalu Naalakkersuisut aqqutissaasinnaasut marluk atuarniarpaat, GE-meersorli Brian Buus Pedersen qulanngilaq. Isumaqarpormi nunarput kisimiikkuni Tuluit Nunaannutt isumaqatigiinniarnerni sanngiissasoq:
- Kalaallit Nunaatta Danmarkimik, EU-millu suleqateqarluni - uanimi peqatigiikkatta - qanoq ililluni pitsaanerpaamik angusaqarsinnaanini misissussagaa kaammattuutigerusupparput, GE-p pisortaa, Brian Buus Pedersen, oqarpoq.
