Grønlandsbanken: Akileraartarnermik aaqqissuusseqqinnerup aningaasalersorneqarnera erfassorinalaarsinnaavoq

- Akileraartarnermut aaqqissuusseqqinneq aaqqissusseqqinnerni arlaqartuni siulliusoq oqaatigisariaqarpoq. Eqimattat sunnerniakkat kissaatitigineqartoq malillugu sunnerneqarnissaat iluatsittussaarpasippoq.

Naalakkersuisut akileraartarnermik aaqqissuusseqqinnerat takutsiaannarlu Grønlandsnbankenip pisortaa Martin Kviesgaard taama oqaasissaqarpoq. 

Akileraartarnermut aaqqissuusseqqinniarneq tallimanngormat saqqummiunneqarpoq. "Nunarput najoruminarnerulersitsigu"-mik qulerutsiillutik, politikerit Siumumeersut aamma Inuit Ataqatigiinneersut inunnut suliffilinnut qaammammut 1.000 koruunit missaannik tunniusserusupput. 

Suliffeqarnerup akilersinnaanerulernissaa inuiaqatigiinnilu akissaatikinnerusut aningaasaqarnerata oqinnerulernissaa siunertaavoq. Martin Kviesgaardilu naapertorlugu sunnerniarneqartut iluaqusernissaat anguneqassaaq. 

- Akissarsiakinnerusut sulinissaminnut kajumilersinneqassapput, ilaqutariillu piffissami kingullermi akit qaffakkiartorneranik annertunerpaamik eqqorneqartut, aningaasaqarniarnerat oqinnerulissaaq, taanna oqarpoq. 

Kalaallit Nunanni ilaqutaariit amerlanerit piffissami kingullermi niueriniareeraangamik allagartaa takullugu pisarnerminnit kiakkernerususarsimanissaat taassuma ilimagaa. 

Aningaasalersorneqarnerali inissilluartariaqarpoq

Aaqqissuusseqinnerup sanngeequtaanik tikkuaassaguni, Martin Kviesgaardip aningaasalersorneqarnera, imaluunniit aningaasalersorneqarsimannginnera tikkuarusuppaa. 

- Aningaasalersorneqarnera erfarsornalaarsinnaavoq. Aningaasalersornissaa qulakkeerniarlugu iliuuseqartoqartariaqarpoq, taamaaliortoqanngippat nunatta karsia aappaagu amigartuussaaq, taanna tikkuaavoq.

Aaqqissuusseqqinnerup 360 millionit koruuninik naleqarnissaa aappaagulu januaarip aallaqqaataani atuutilernissaa Nalaakkersuisut naatsorsuutigaat. Aningaasalli taakku Naalakkersuisunit nassaarineqanngippata nunatta karsiani amigaatigineqalerumaarput. 

- Aningaasalersornissaa qulakkeerneqartariaqarpoq, nassaartoqanngippammi nunatta karsiata 2025-mi amigaateqalernissaa ersarippoq.