GREP-ip aningaasaliissutigisaminik annaasaqarsinnaanini ernummatigigaa
Nunamineralsip immikkut ittumik ataatsimeersuarnerani ippassaq najuuttunut ilaavoq Patrick Newman Greenland Rare Earth Projectimeersoq - GREP-imeersoq.
Taassuma Nunamineralsip maanna ajornartorsiutini qaangissagaa neriuutigaa. Paatusuumi ingerlatsinermut 2,6 millionit koruuninik aningaasaliisimaneranut tamanna peqquteqarpoq, Nunamineralsillu suliffittut matuneqassagaluarpat aningaasaliissutit ilisimalikkallu annaaneqassapput.
AAMMA ATUARUK NunaMineralsip pisortaanera atorfimminit tunuarniuteqarpoq
- Avataanit isigalugu pisinnaasat ilisimasallu piffissami katersorsimasat pingaarutillit annaaneqassapput. Aserorternissai ajornanngillat, katersoqqinnissaaliukua ajornartut, Patrick Newman GREP-meersoq oqarpoq.
Naalakkersuisunit pigineqarnera ersersinneqarpoq
Taassuma oqaluttuaraa, Nunamineralsip suleqatai pitsaanersat ilarigaat, aammalu ujarassiuutut suliallit pitsaanersaasa ilisimagaat, taamaattumik Nunamineralsikkut suleqatigileramigit kikkuuneri ernumassutiginngilai. Pisortat aatsitassarsiorfiutigigaat ersareqaaq:
- Qanittukkut aatsaat paasivara naalakkersuisut pingajorarterutaannaannik piginneqataassuteqartut, tamannali pingaartuunngilaq. Pingaaruteqarnerpaavormi nukittuumik naalakkersuisunit pigineqarnera ersersinneqarmat, nunanit tamalaaneersunit aningaasaliisartunit tatigineqarneq tassuuna pilersinneqarmat, illarluni taama oqarpoq.
AAMMA ATUARUK NunaMinerals A/S-ip siunissaa ullumi aalajangiiffigineqassaaq
Kujataata kangiani aatsitassarsiortut misileraaffianut Paatusuumut 400.000 dollarsit GREP-ip 2014-imi aningaasaliissutigai. Nunamineralsilu akiliisinnaajunnaassagaluarpat tamaasa annaaneqartussaapput, akuersissut Aatsitassanut aqutsisoqarfimmut utissammat.
- Tamanna pitsaanerpaanaviangilaq. Tamanut pitsaanerpaamik aaqqiisoqarnissaa tamatta neriuutigaarput. Kalaallit Nunaannimi aatsitassarsiornerup tungaatigut periarfissaginnerpaat ilagaat, aatsitassallu qaqutigoortut eqqarsaatigalugit Kinap avataani tamanna immikkuullarissuuvoq, Patrick Newman oqarpoq.
Paatusuumut akuersissummut tunngatillugu Nunamineralsip qanittumi apeqqutigaa akuersissut GREP-imut nuunneqarsinnaanersoq, Naalakkersuisulli tamanna naammassisinnaaneraat imaluunniit soqutigineraat suli ilisimaneqanngilaq.
