Greenpeace: Qalasersuaq eqqaalu eqqissisimatitanngortinneqarlik
- Qalasersuup immikkuullarissuunera eqqarsaatigalugu tamaanilu nunap pisuussutaasa uummaatsut atorluarneqarnissaat eqqarsaatiginagit, Qalersuup siunissami paarilluarneqarnissaanik, Danmark Kalaallit Nunaallu siuttuusariaqartut neriuutigaarput, Greenpeacemi suliassanik pilersaarusiornermi pisortaagallartoq, Jon Burgwald oqarpoq.
Qalasersuup Kalaallit Nunaanut immap naqqatigut atasuuneranik paasiniaareernermi, Danmarkip Kalaallit Nunaatalu ataatsimoorullugu FN-imut qinnuteqatigaat, Qalasersuup ilarujussuata Naalagaaffeqatigiinnit akisussaaffigineqalernissaa pillugu.
AAMMA ATUARUK Issittup imartaata naqqa siunissaq pillugu ilungersuutigineqartoq
Naak aatsaat ukiut qulit missaannik qaangiuppata qinnuteqaat FN-imit aalajangiiffigineqartussaassagaluartoq, Qalasersuup qanoq atorneqarsinnaanera Naalagaaffeqatigiinnit maanngagaaq piumasarisariaqartariaqartoq, Greenpeace isumaqarpoq. Tassalu Qalasersuup eqqaatalu eqqissisimatitaalernissaamik Danmark piumasaqartariaqartoq Greenpeacekkormiut isumaqarput.
- Ukiut qulit 15-nillu qaangiuppata nunarsuatta qanoq isikkoqarnissaa maanna oqallisaavoq. Sila pillugu isumaqatigiinniartoqarpoq, tamannaannarluunniit eqqarsaatigalugu, Naalagaaffeqatigiit Qalasersuarmut pitsaasumik maanngagaaq isummerunik tamanna pitsaasumik takutitsinerussaaq, Jon Burgwald oqarpoq imalu nangilluni.
- Ukiut qulit qaangiuppata FN-illu suliaq suliarereerpagu nunat issittumut attuumassuteqartut, soorlu Rusland aamma Canada, taamanikkussamut aatsaat isumaqatigiinniarfigineqaleraluarpata tamanna nunalerngusaannermik kinguneqaannartussaavoq, Jon Burgwald oqarpoq.
AAMMA ATUARUK Issittup imartaanik piginnittuulernissamik Danmark piumasaqaateqartoq
Danmarkip Kalaallit Nunaatalu Qalersuup eqqaatalu eqqissisimatitanngortinnissaanik maannangaaq siunnersuuteqarneranni, Rusland Canadalu politikkikkut isumaqatigiinniarnissamut ersissuteqarlutik tunuartilernavianngitsut, Jon Burgwald isumaqarpoq.
- Naalagaaffeqatigiit maanna siunnersuuteqarpata, Rusland aamma Canada pinngitsaalipajaarlugit siunnersuummut isumaqataatilerneqarsinnaapput imaluunniit Qalersuup eqqissisimatinneqarnissa pillugu akerliugunik taava nunanit tamalaanit isiginerlunneqarsinnaasutut takorloorneqarsinnaapput, Greenpeacemi suliassanik pilersaarusiornermi pisortaagallartoq, Jon Burgwald oqarpoq.
