Issittup imartaata naqqa siunissaq pillugu ilungersuutigineqartoq
Tamannali imaaliallaannaq pisinnaanngilaq, tassami Danmarki piumasaqaataa ilisimatuussutikkut tunngavilersugaangaluartoq naalagaaffiit issittup imartaanut sineriallit tamarmik aamma tamassuminnga piumasaqarsinnaapput.
Piumasaqaatilli assigiissinnaaneri pissusissamisuuinnartoq, Danmarkimi Kalaallit Nunaannilu ujarassiuutut misissuiffimmi, GEUS-imi nunap toqqavianik misissuinermi pisortaq, Jens Jørgen Møller oqarpoq.
Aamma atuaruk Issittup imartaanik piginnittuulernissamik Danmark piumasaqaateqartoq
- Immap naqqa atuarlugu Kalaallit Nunaat Qalasersuarmut toqqaannartumik attuumassuteqarnersoq uppernarsassavarput, Jens Jørgen Møller oqarpoq.
Qalasersuarmut Avannarlermut immap naqqa atuarlugu toqqaannartumik atassuteqarneq nunat uppernarsarsinnaagunikku taakku qinnuteqarsinnaasut, Naalagaaffiit Peqatigiinnit oqaatigineqarpoq.
Allatut oqaatigalugu inuk nunaminiit immap naqqatigut pisuulluni qunnermik akornuteqarani qalasersuup naqqanut pisinnaappat, taava qalasersuaq nunap taassuma piginnittuuffigalugu oqaatigisinnaavaa.
- Tassalu nuna piumasaqaateqartoq qalasersuarmut immap naqqatigut atappat, aammalu piumasaqaatit aalajangersakkani nalunaarsorneqartut naammassineqarpata, taava nuna piumasaqaatinik naammassinnittoq qalasersuarmut piginnittuulersinnaavoq.
Kisianni nunat issittumiittut imartaasa naqqi imminnut ataqatigissinnaapput. Assersuutigalugu Kalaallit Nunaata, Ruslandip Canadallu imartaasa naqqi atasinnaapput, Nunallu taakku killeqarfissamik piumasaqaataat qaleriissinnaallutik, Jens Jørgen Møller KNR-imut nassuiaavoq.
Nunanit allanit aamma piumasaqaatigineqartoq
- Tassalu nunat allat piumasaqaataasunik naammassinnissinnaagunik aamma nunap ilaanut susassaqalissapput, tamannalu nunani allani takornartaanngilaq. Nunallu killeqarfii allallit qaleriiffeqarput, Jens Jørgen Møller oqarpoq.
Savalimmiut avannaani immap naqqata agguarnerani Norge, Island Savalimmiullu killeqarfii qaleriiffeqarput.
FN-ip imartanik piginnittuuneq pillugu ataatsimiititaliarsuata nunat ilisimatussutsikkut misissuineri kisiisa nalilersuiffigisussaavai, killeqarfiilli nunanit piumasarineqartut qaleriiffeqarpata, nunat pineqartut akornerminni isumaqatigiinniarnikkut killeqarfiit inissinniartussaavaat.
Siunissaq ungasinnerusoq eqqarsaatigineqarpoq
Naak qalasersuup tungaa tamanna aatsitassaqarfissuunngitsoq ilisimatuunit oqaatigineqaraluartoq, tamanna Naalagaaffeqatigiinnit pigilissallugu piumasaqaatigineqarmat pissutissaqarluartoq Jens Jørgen Møller oqarpoq.
- Pisuussutinik eqqarsaataasimanngitsunik siunissami atorluarneqarsinnaasunik nassaartoqaratarsinnaavoq. Taakku tassaasinnaapput uumassusillik imaluunniit atortussiassanik qaqutigoortunik peqaratarsinnaavoq. Taamaammat pissutissaqarluarpoq.
