Inuussutissarsiutit

VIDEO Greenland Expressip akiliutigineqartut utertinniaasaarai

Gert Braskip timmisartuutileqatigiiffiata Greenlandip Expressip aasaq manna timmisartuussinissani tamaasa taamaatinnarpai, billetsisisimasut akiliutaasa utertinneqarnissaat neriorsuutigalugu. Akiliutiminnilli utertitsivigineqarnissaminnik utaqqisut suli amerlapput.

Allattoq Nûno Isbosethsen, Camilla Dam

septembarip 01-at 2015 11:35

Ilaqutariit Hansenikkut arfiniliupput 18.010 koruuninillu akiliillutik billetsisisimallutik. Allakkani juulip 13-iani ullulerneqartuni aningaasat piaartumik utertinneqarnissaannik ilisimatinneqarput.

Asasara Greenland Expressimi angalasoq,
Aningaasat billetsinut akiliutigisimasa sukkanerpaamik utertinneqassapput, akiliinermi atorneqarsimasoq aningaasanik ikisiffigineqassaaq. Aningaasat ullut pingasut arfinillillu akornanni sivisutigisumik ikiniassapput..

Ilaqutariilli Hansenikkut maanna qaammatip aappaa avillugu utaqqeerlutik 18.010 koruunit suli tigunngilaat.

Aamma atuaruk Greenland Express ukiormanna timmisartuussissanngilaq

- Aningaasat taakku amerlagamik imaaliallaannarluni uterteqqissinnaannginneri paaseriasaarakku sakkortulaarpoq. Inuit arfiniliulluta angalasussaagaluaratta akiliillutalu.

- Asuli pineqartutut misigisimavugut, Qaqortormiu Jimmy Hansen KNR-imut taama oqarpoq.

Uiloq Nielsenip akiliutigisimasani 8.988 koruunit suli tigusimanngilai.

- Pakatsinarpoq taanna. Neriorsuipput aningaasat tigussagigut, tamannalu ajortussaqartinngilara. Kisianni aningaasat suli tigunagit kamannarpoq. Neriorsuinerluiinnavippoq suliffeqarfik taanna, Uiloq S. Kleist Nielsen oqarpoq.

AAMMA ATUARUK Greenland Express Atuisartut siunnersuisooqatigiivisa misissuiffigigaat

Utoqqalinersialik Ishøjimeersoq Elisabeth Hamalainen aamma pakatsisinneqarpoq.

- Ajorpoq. Nammineq ilaanni nikagilertarpunga taakku pillugit. Soorlu soqutigineqanngitsutut.

Ilaqutariit Hansenikkut Greenland Express oqarasuaatikkut e-mailikkullu ikinnerpaamik quleriarlutik attaviginiarsimagaluarpaat qisuariarfigineqanngitsumilli.

AAMMA ATUARUK Greenland Expressip taamaatitsineri Atuisartut siunnersuisoqatigiivini ulapaartitsisut

Septembarip qulingiluaata kingorna paasinarsissaneraraa

Pisortarli Gert Brask billetsisimasunut pakatseqqaqisunut oqaasissaqarpallaanngilaq.

- Suliarineqarpoq. Aperusukkussinga e-mailikkut apersussavassinga. Oqaaseqarsinnaanngilanga, aatsaat 9-ata kingorna (septembarimi, aaqq.), Gert Brask KNR-imut taama oqarpoq.

Sooq aatsaat 9-ata kingorna?

- Tassa aningaasaliisut ... E-mailersinnaavusi.

Tamatuma saniatigut pisortaq Gert Brask oqaaseqaqqikkumanngilaq. Aningaasaliisut pissutigalugit oqaaseqaqqusaannginnerarpoq.

Maannalu tassa apeqqutaaginnalerpoq billetsisisimasut akiliutigisatik qaqugu tigussaneraat imaluunniit tigusinnaassaneraat. Tamanna Qanoruumi unnugu marlunngornermi nal. 19 aamma 21 aallakaatinneqartussami maanilu knr.gl-imi annertunerusumik paasisaqarfigisinnaavat.

AAMMA ATUARUK Greenland Express kinguartitseqqittoq