Greenland Express Atuisartut siunnersuisooqatigiivisa misissuiffigigaat
Timmisartortitseqatigiiffiup Greenland Expressip maannamut ataasiarluniluunniit timmisartuussisimanngitsup perulluliuutaanera pissutigalugu Danmarkimi Nunatsinnilu Atuisartunut Siunnersuisoqatigiit akuliutsinneqarput.
Angalaneq timmisartuussinerlu pillugit tusagassiuut check-in.dk taama allaaserisaqarpoq.
Københavnimi Atuisartunut Siunnersuisoqatigiit Greenland Express pillugu naammagittaalliuutinik apuussivigineqareersimavoq. Timmisartortitseqatigiiffiup angalanissanut maannamut arlaleriarlugit kinguartinneqarsimasunut akiliutinik tamakkiisumik utertitsinissamik neriorsuuteqarsimaneranik tamanna pissuteqarpoq.
Ullormili aallarfissami akiata assinganik akiliilluni Air Greenlandimit billetsimik pisinissamut aningaasat utertinneqartut naammanngillat. Angallannerummi nalliuteruttorfiani Air Greelandimi billetsit akikinnerit tamakkerlugit qangali pisiarineqareersimapput.
Danmarkimi Atuisartunut qullersaqarfimmi siunnersortaaneq Susanne Bager naapertorlugu, angalaniartut ullormi angalaffissaminni timmisartortitseqatigiiffimmut allamut ilaanissaminnik neqeroorfigineqarnissaminnut pisinnaatitaaffeqarput.
AAMMA ATUARUK Greenland Expressip angalanissat maangaannartippai
AAMMA ATUARUK Greenland Expressip taamaatitsineri Atuisartut siunnersuisoqatigiivini ulapaartitsisut
Greenland Expressip billetsinut akiliutigineqartunik utertitsinissamik neqerooruteqarnermi saniatigut, sullitani timmisartortitseqatigiiffimmi ullormi allami namminneq toqqakkaminni siumut-utimullu angalanissamut gavekortimik neqeroorfigai. EU-lli malittarisassai naapertorlugit sullitat tamatumunnga qujaannarsinnaatitaapput taartisiaqartinneqarsinnaallutillu, Susanne Bager Check-in.dk-mut taama oqarpoq.
Taamaliortoqassappalli sullitap angalanissami timmisartortitseqatigiiffimmut allamut nuutsinnissaanik inniminniisoqarnissaa pillugu Greenland Expressimut attaveqarsimanerminut uppersaammik takutitsisinnaasariaqarpoq.
Siunnersuisoqatigiinnit aamma kaammattuutigineqarpoq timmisartortitseqatigiiffik attavigisinnaasimanngikkaanni Greenland Expressimut ilaaffissap piffissami aallarfissaani tunngaviatigut pinngitsoorani mittarfimmiittoqartariaqartoq. Aatsaallu tamatuma kingorna taarsiivigineqarnissamik piumasaateqartoqarsinnaammat.
AAMMA ATUARUK Greenland Express kinguartitseqqittoq
AAMMA ATUARUK VIDEO Greenland Expressip aasaanerani timmisartuusseqqaarnissani kinguartippaa
