Grønlandsbankimi pisortaq: Aningaasaqarniarnerput pitsanngornerusariaqarpoq

- Aningaaserivimmi takusinnaavarput, suliffeqarfiit innuttaasullu sullitagut sipaagaqartorujussuusut. Aningaasat atukkatik akilersunngikkunikkit aningaaserivimmiititatik amerliartortippaat. Tamakkuuppullu inuiaqatigiit ineriartorneranut unikaallatsitsitseqataasut, Grønlandsbankip pisortaa Martin Kviesgaard taama oqarpoq.

Aningaasaqarnerup ingerlalluaqqilernissaa neriuutigigaluarpaa. Suliffeqarfiit innuttaasullu aningaasaleeqataanikkut ineriartortitseqataasinnaammata.

Grønlandsbankip pisortaata aningaasaqarniarnitta ukioq manna ineriartoqqilernissaa ilimagisimagaluarpaa. Kisiannili Naatsorsueqqissaartarfiup 2015-imi kvartalit aappaanni aningaasaqarnikkut pissutsit pillugit saqqummiussaani atuarneqarsinnaasut malillugit  nunatta aningaasaqarnerata nalilernissaanut suli siusippaallaarpoq.

Angallatinut motoorilinnut aningaasartuutit marloriaatinngortut

- Aningaasaqarnitta ineriartornera suli kigaappoq, aningaasaqarniarnerput pitsanngoriartorniartussaagaluarpoq. Aningaasaqarniarnerput ukioq manna siuariarsimanissaa ilimagisimagaluarparput, kisiannili Naatsorsueqqissaartarfiup saqqummiussaani  taamaattoqarnersoq suli takuneqarsinnaanngilaq. Ukiullu sinnerani aningaasaqarnerput takoqqaalaariarlugu siuariartotoqarnersoq aatsaat iluamik nalilerneqarsinnaavoq, Martin Kviesgaard oqarpoq.

Naatsorsueqqissaartarfiullu saqqummiussaani pitsanngoriarsimasut tassaapput angallatinut motoorilinnut aningaasartuutit marloriaatinngorsimanerat. Tamanna ukiup siulianut naleqqiullugu 72,9 procentinik qaffariarsimammat.

Taamaattoqarnera aamma bankimi malugineqarsimavoq.

- Biilinik eqqussuineq annertuseriarsimasoq malugisineqarsinnaavoq. Atuisullu aningaasanik atorniartarnerat angallatinut motoorilinnut qaffaallassimavoq. Ukiup aallartinnerani angallatinut motoorilinnut aningaasaliisarnerit amerleriaateqartut malugilluarsinnaavarput, Martin Kviesgaard oqarpoq.