Uran pillugu Danmarkilu isumaqatigiissusiornissaq qanilliartorpoq
- Neriuutigaarput soorunami Nunatta Danmarkillu akornanni taamatut isumaqatigiissuteqarsinnaanissaat pisinnaassasoq, piffissami aggersumi. Piffissaleqqissaarlugu oqaatigisinnaanngilara siusinnerpaamik qaqugu naammassissanersoq. Kisianni ukiup ataatsip iluani naammassereersimanissaa anguniarsarivarput, Vittus Qujaukitsoq oqarpoq.
Nunarput uran pillugu oqartussaaffinnik arlalinnik, soorlu uranimik avammut tunisisinnaanermut oqartussaaffimmik, tigusiniarluni ukiuni kingullerni sulissuteqarpoq.
Suleqatigiinnissamut suut isumaqatigiissutiginiarneqarneri Vittus Qujaukitsup sukumiisumik oqaatigerusunngikkaluarlugit, nunat assigiinngitsut akornanni uran pillugu isumaqatigiissutit Nunatsinni atuutilernissaannut, Inatsisartunut ukiaru saqqummiunneqartussanik, sulissuteqarlutik, nassuiaavoq.
Kuannersuarni uranimik piiaaffimmik pilersitsiniartoqarpoq, 2019-imi atuutilersinnaasumik, savaatilinnillu ernumassutigineqartumik.
Sulinermik inuussutissarsiortut kattuffiat SIK allamik isumaqarpoq. Uranimik qalluisoqalissappat suliffinnik pilersitsisoqassasoq, SIK-mi siulittaasoq Jess G. Berthelsen isumaqarpoq.
