Nunarput piutillugu USA-mut attaveqarneq ajornannginnerusoq
- Issittoq pingaaruteqartorujussuusoraara. Savalimmiut, Kalaallit Nunaat Danmarkillu qanimut suleqatigiinnissaat pingaaruteqarpoq. Suliassaqarfiuvoq periarfissaqarneranilu soorunami suliarissavugut.
Danskit nunanut allanut tunngasunut ministeriat, Anders Samuelsen KNR-imit apersorneqarami taama oqarpoq.
Nunanut allanut sillimaniarnermullu qallunaat naalakkersuisuisa 2017-imit 2018-ip tungaanut periusissiaanni nutaami Issittoq pingaarnerit ilaanniippoq, pingaartumik issittumi aningaasarsiorneq pingaartinneqarluni.
Pingaaruteqaqataasut
Matut nunanut allanut ’ammarneranut’ kujasissumi kunngeqarfeqarnera kisimi peqqutaanngitsoq Kalaallit Nunaatali Savalimmiullu ilaanerat tamatumunnga peqqutaaqataasoq, danskit nunanut allanut ministererisimasaata, Martin Lidegaardip (R) 2014-imi oqaatigaa.
Apeqqummi Kalaallit Nunaat issittorlugu pillugit qallunaat nunanut allanut tunngasut pillugit politikikkeqarnerannut qanoq isikkoqarnersoq Anders Samuelsenimut apeqqutigineqarmat ima akivoq:
- Inuiaqatigiit allanut sanilliulluta Danmarki amerikamiut aqutsisuinut ajornaannerusumik attaveqartut takusinnaavarput.
AAMMA ATUARUK Naalagaaffeqatigiit nunanut allanut attaveqartarneranni Nunarput iluaqutaasartoq
Naalagaaffeqatigiittoqanngikkaluarpallu Danmark nunani allani maannatulli oqaaseqarsinnaatigissanersoq aperineqarami ima akivoq:
- Naagga, taamaakkaluarpat oqaaseqarsinnaassuseqarpiassanngikkaluarpugut, tamanna qularutissaanngilaq.
Tassa maannakkut ataatsimik aallamik pingaaruteqartoqarpa? Qanoruna isumaqartutit?
- Tassami Issittoq pingaaruteqartorujussuuvoq. Tamanna takuneqarsinnaavoq. Aamma Amerikamiunut, aammattaaq canadamiunut russinullu… Tamanna ukiuni aggersuni pingaaruteqalissaaq.
Samuelsenip nunarput inissaqartikkusukkaa
Kalaallit Nunaata namminersulivikkiartornissamut kissaateqarnera ataqqillugu, Samuelsen erseqqissaavoq taamaakkaluartorli nunat pingasut ataatsimoorlutik nukittunerummata naalagaaffeqatigiinnerup attatiinnarneqarnissaa kissaateqarluni.
Ukiunili kingullerni Kalaallit Nunaata Danmarkillu akornanni politikkikkut aaqqiagiinngissuteqartoqarsimavoq. Inatsisartut, Naalakkersuisut kalaallillu folketingimut ilaasortaatitaasa Naalagaaffiup Kalaallit Nunaat nunanut allanut- illersornissamut- sillimaniarnermullu politikkimi ilaatittanngimmagu isornartorsiortareerpaat.
AAMMA ATUARUK Kalaallinik isumaqatiginninniarnernut qaaqqusinnginneq ileqqupalaajuvoq
Samuelsenilli nunarput nunanut allanut tunngasunut politikkimi periarfissat tamaasa atorlugit inissaqartikkusuppaa.
Isumaqarpit Kalaallit Nunaat danskit nunanut allanut politikkiani nalitoqataasoq?
- Tassa uanga tamanna kissaatigaara.
Ullumikkut taamaassoraajuk?
- Tamatumunnga kalaallit inerniliinissaat ajunnginnerusoraara…
Nunanut allanut ministeriunerit pillugu illit maannakkut aperaakkit.
- Tassa sapinngisamik tamatta inissaqartinnissarput sulissutigaara. Tamannalu Kalaallit Nunaannut Kalaallit Nunaatalu qanoq inissisimarusunnera ataqqillugu suliaqarfigisarpara. Tamannalu Kalaallit Nunaata namminiilivinnissamik kissaateqaruni qanorlu kinguneqarnissaata inerniliiffiginissaa periarfissaqarfigaa. Tamannali uanga akuliuffigissanngilara.
Danmarkip Kalaallit Nunaannik pilliuteqarluni nunanut allanut politikkimik ingerlatsineranut isornartorsiuinermik nunanut allanut tunngasunut ministerip qanoq paasinninneranut apeqqummi ima akivoq:
- Taama paasinngilara. Kalaallit soqutigisaminnik akisussaaffeqalerusunnerat ataqqingaatsiarpara. Angusassalli ajunnginnerpaamik anguneqarnissaat kalaallinik suleqateqarnissaq uanga isumagaara. Immikkullu sulinermiit suleqatigiinnikkut tamatta iluanaaruteqarfigisinnaagipput isumaqarpunga.
