Naalagaaffeqatigiit nunanut allanut attaveqartarneranni Nunarput iluaqutaasartoq
Sorsunnerulli nillertup qaangiunnerani politikkikkut allatut ingerlaneqalerpoq, Kalaallit Nunaatalu iluaqutaanera apparpoq, tamannali allanngoriataarsinnaavoq.
USA'p Ruslandillu akornanni pissutsit ajorteriassappata Nunatta iluaqutaanera Danmarkimut naalagaaffeqatigiinnullu iluaqutaasinnaasoq nalunaarusiap nutaap takutippaa.
Center for militære studier Københavnip Universitetianiittup nalunaarusiaq nutaaq saqqummersippaa Issittup Danmarkip USA-mut attaveqarneranut pingaarutaa.
AAMMA ATUARUK USA-p Nunarput pisiariumasimagaluarpaa
Ilisimatuut nalunaarusiortut inerniliuppaat Danmark amerikami oqartussanut isumaqatigiinniaraangami Kalaallit Nunaat iluaqutigisaraa.
Danmark arlaleriarluni pisuutinneqartarsimavoq NATO-mut pisussaaffiit eqqarsaatigalugit Pituffimmi sakkutooqarfik iluaqutsiullugu pisussaaffinnik annikillisaavigineqartarsimasoq.
Paragraf 37 naapertorlugu apeqqummut Kim Kielsen akissummini decembarimi erseqqissaavoq Danmark Pituffik pissutigalugu NATO-mi akikilliliivigineqartarsimanersoq uppernarsaatissaqanngitsoq.
AAMMA ATUARUK Danmarkip NATO-mit akikillisaavigineqartarnera takussutissaqanngitsoq
- Naalakkersuisut ilisimasaqanngillat uppernarsarneqarsinnaanersoq Danmark Pituffik pillugu NATO-mi ilaasortaanerminut akikilliliivigineqartarnersoq, Kim Kielsen akissummini allappoq.
Nalunaarusialli nutaap erseqqissaatigaa USA'p Issittumut soqutigisaqarnerata kingunerigaa Kalaallit Nunaata Danmark iluaqusertarsimangaa, Danmarkillu USA-mut attaveqarnera siunissami iluaqusertarsinnaagaa.
