GME-p pisortaata VVM-imut missingiutip isornartorsiorneqarnera akerlileraa

Australiamiut aatsitassarsiornermik ingerlateqatigiiffianni Greenland Minerals and Energymi (GME) pisortap DR-imut oqaatigaa Kuannersuarni piiaavissamit akuutissat toqunartortallit Narsamut angunnavianngitsut.

- Akuutissat radioaktiviusut ullumikkumit annertunerusumik nerisariaattunut imissamulluunniit akulerunnissaannik inerniliinissamut pissutissaqanngilaq, pisortaq John Mair DR-imut taama allagaqarpoq.

GME-p Kuannersuarni piiaavissamut avatangiisit pillugit nalilersuineq pillugu nalunaarusiassaanut missingiut avatangiisinik illersuiniaqatigiiffiit Nunatsinneersut Danmarkimeersullu arfinillit sapaatit-akunnerata siuliani avammut saqqummiuppaat.

DR-ip allagaatinik takunnikkumalluni Namminersorlutik Oqartussanut noqqaassuteqarluni missingiummik pissarsinerata kingorna tamanna pivoq.

Illersuiniaqatigiiffiit naapertorlugit, piiavissaq qinngornerit ulorianartut radioaktiviusut eqqakkanik katersuivimmeersut pissutigalugit piiaavigineqartup eqqaani avatangiisinik pinngortitamillu innarliisinnaavoq. John Mairilli eqqakkanik katersuiviup inissisimaffia 'pitsaalluinnartutut' taavaa, katersuivissap naqqa qaarsuummat aammalu qaarsumit ungaluneqarsimammat.

Nalunaarusiap inaarutaasup naammassineqannginnerani, ukiorlu manna kingusinnerusukkut tamanut tusarniaassutigineqarnissaa sioqqullugu oqallinneq peqataaffigerusunngilaa.

- Siusippallaartumik oqallisigineqarnera Kalaallit Nunaanni akuersissuteqarnissamik suliamut innarliisinnaavoq, John Mair DR-imut mailerluni taama allappoq.