Uranimik suliniutissaq GME-p akueraa - avatangiisinik illersuiniaqatigiit kamapput

Kuannersuarni uranimik piiaavik piviusunngortinneqassappat, tamanna avatangiisinut, pinngortitamut, uumasunut inunnullu ajoqusiisinnaasumik sunniuteqarnavianngilaq.

Avatangiisinut sunniutaasussanik nalilersuinermut nalunaarusiamut VVM-imut missingiummi, ingerlatseqatigiiffiup Greenland Minerals and Energy Ltd.-ip, GME-p, Namminersorlutik Oqartussanut ukiaq tunniussaani tamanna atuarneqarsinnaavoq.

Danmarkip Radioa nalunaarusiamik takunnikkumalluni noqqaassuteqarsimasoq taama allaaserisaqarpoq. Avatangiisinik illersuiniaqatigiiffiit arlallit aamma nalunaarusiaq pissarsiarisimavaat.

Nalunaarusiami ilaatigut atuarneqarsinnaavoq piiavissaq sumiiffimmi silaannaap pitsaassusianut annerusumik sunniuteqassanngitsoq, aamma qinngornernik ulorianartunut radioaktiviusunut Nunatsinni killiliussat ataateqqangaatsiarneqassapput.

AAMMA ATUARUK GME-p aktiaatai nalitunerulersut

Taamatulli inerniliisoqarnera avatangiisinik illersuiniaqatigiiffiit Nunatsinneersut Danmarkimeersullu arlallit upperinngilaat.

Avatangiisinik illersuiniaqatigiiffimmi Avatami siulittaasup Mikkel Myrupip tusagassiorfinnut nalunaaruteqarluni erseqqissaatigaa uranimik piiaanermi nukissiuutinik atuineq silap pissusianut akornutaassasoq.

- Piiaaveqarnermik suliniut Aatsitassat pillugit inatsimmi silap pissusianik illersuinermut malittarisassanik unioqqutitsissaaq, VVM-imut missingiutaasoq naapertorlugu Nunatta CO2-mik aniatitsinera tamarmiusoq 63 procentinik annertunerulersinneqassammat.

AAMMA ATUARUK Uranisiornissamut qinnuteqaatissamut itigartitsinissaq naalakkersuisup neriorsuutigerusunngikkaa

Danmarkip Radioata allagaatinik takunnikkumalluni noqqaassuteqarluni tunineqarnerata kingorna, tusagassiorfiit allat VVM-imik nalunaarusiamik takunnikkumanerat Namminersorlutik Oqartussat itigartitsissutigisimavaat.