GME-p isumaqatigiissut tunniukkumanngikkaa
Taamaammat Shengsep ingerlatseqatigiiffimmik Kuannersuarni suliniuteqartumik tamakkiisumik tigusinissaminut periarfissaqarnersoq Namminersorlutik Oqartussat nakkutigisinnaanngilaat. Aviisi Sermitsiaq ullumi saqqummersoq taama allaaserisaqarpoq.
Aatsitassanut naalakkersuisoqarfiup GME-llu attaveqatigiissimanerannik aviisi takunnikkumallugu noqqaassuteqarsimavoq, tassanilu atuarneqarsinnaavoq GME-p pisortaata John Mairip Shengsemut isumaqatigiissut tunniukkusunngikkaa, pisortaq naapertorlugu isertuussassaammat aammalu Naalakkersuisut "allagaatinik paarisaqarsinnaanerat isertuussassanillu isertuussisinnaanerat" GME-p tatiginngimmagu.
GME-p Shengsellu isumaqatigiissutaat Namminersorlutik Oqartussat misissorusuppaat, Sydneyimi børsimut Shanghaimilu børsimut nalunaarutigineqarsimasut imminnut naapertuutinnginnerat paasineqarsimammat.
Aamma atuaruk Evaldsen: GME pillugu nalunaarut misissorneqalerpoq
Nutsikkami pisortatigoortuunngitsumi aatsitassanut naalakkersuisoqarfiup suliaritissimasaani Shengse børsimut nalunaarummi kinamiutut allaqqasumi allappoq ingerlatseqatigiiffik GME-p 60 procentianik pisinissaminut periarfissaqartoq, taamaalillunilu Kuannersuarni suliniut aqussinnaalersinnaassallugu:
- Kuannersuarni suliniutaasumut atatillugu piianissamut akuersissummik tunniussisoqarpat teknikkikkullu piareersaasoqareerpat, Sermitsiaq taama allaaserisaqarpoq.
John Mairip KNR-imut siornatigut oqaatigaa isumaqatigiissutip nutserneqarnerani oqaatsitigut naapertuutinngitsoqartoq. Pisortarlu isumaqarpoq kinamiut kingusinnerusukkut GME-mi Kuannersuarnilu suliniummi piginneqataassutinik amerlanerusunik pisinissaminnut soqutiginnissinnaallutik oqaatigiinnarsimavaat.
