Evaldsen: GME pillugu nalunaarut misissorneqalerpoq

Ingerlatseqatigiiffimmik Greenland Minerals and Energymik piginnittuunermut tunngatillugu nalunaarutit imminnut assortuuttut marluk Naalakkersuisunit maanna misissorneqalerput. Aviisi ullormut saqqummersartoq Politiken taama allaaserisaqarpoq.

Allattoq Mads Lynge

oktobarip 02-at 2016 15:44

Kinamiut aatsitassarsioqatigiiffiata Shenghe Resourcesip GME-mi piginneqataassutinik 12,5 procentinik pisisimanini qanittukkut nalunaarutigaa, GME-llu tamanna nammineq tusagassiuutinut nalunaarummi kingorna aamma uppernarsarpaa.

Aamma atuaruk Kinamiut Kalaallit Nunaanni aningaasaliinerat USA-mit alaatsinaanneqarpoq

Nalunaarutilli marluk taakku assigiinngissuteqarput. Shenghe Resourcesimmi oqaatigaa piginneqataassutit 12,5 procentiinik pisinermigut GME-mi piginneqataassutinik siunissami 60 procentinik pisisinnaalluni, taamaalillunilu GME aqussinnaanngussallugu.

Shenghe Resourcesilli siunissami taama piginneqataassuteqalersinnaanissaa GME-p ilumuunnginnerarpaa, Aatsitassanullu naalakkersuisup Randi Vestergaard Evaldsenip maanna tamanna misissortinnialerpaa.

- Toqqaannanngikkaluartumik tunniussisoqalernersoq ersarissumik oqaatigineqarsinnaanngilaq. Ilumut tunniussisoqalernersoq sukumiinerusumik oqartoqarsinnaanissaa siusippallaarpoq. Aatsitassanut Aqutsisoqarfiup tamanna maanna misissussavaa, Randi Vestergaard Evaldsen, aviisimut Politikenimut oqarpoq.

Aamma atuaruk GME-p suleqatitaarnissaa pissutigalugu aktiaataanik tuniniaaneq unitsinneqarallartoq