GG-p pisortaanera: EU-mut ilaasortaaneq puisit amiinik suliamut iluaqutaasimassagaluarpoq
Ditte Sorknæsip Great Greenlandimeersup erseqqissaatigaa naalagaaffiup allanut attaveqarneranut puisillu amiinik eqqussuinissaq pillugu isumaqatigiinniarnernut tunngatillugu nerrivimmi issiaqataanissaq akuutinneqannginnermit pitsaanerusoq.
- Kalaallit Nunaat 2009-mi puisit amiinik eqqusseqqusiunnaarnerup siulliup atuutilersinneqarfigisaani EU-mut ilaasimagaluarpat siusinnerujussuarmik akuutitsisoqarsimassagaluarpoq. Taava inatsit pinngitsoortinneqarsimassagaluartoq takorloorpara, Ditte Sorknæs Atuagagdliutinut taama oqarpoq.
Taanna aamma isumaqarpoq puisit amiinik avammut nioqquteqarneq ulorinartorsiortinneqalermat Nunatta soqutigai illersorniarlugit Danmark siumoortumik iliuuseqarniarpallaarsimanngitsoq. Tamannalu danskit EU-mut aallartitaasa parlamentimullu ilaasortaatitaasa Danmarkip aningaasaqarneranut sunniutilinnik eqqumaffiginninnerunerannik pissuteqarsimasinnaanerarpaa.
Aamma atuaruk Nunatta EU-mit aninini peqqissimissutiginngisaannarpaa
- Inuit peqqussummi pineqannginnerannik naggataatigut aaqqiissummut danskit EU-parlamentimut ilaasortat qujaffigisassaraagut. Sulialli ingerlaneranik uanga nammineq misigisara tassaavoq Danmarkip tungaanit kingusissorujussuarmik aallartittoqarsimanera, Ditte Sorknæs oqarpoq, uiggiullugulu oqaatigaa "Kalaallit Nunaata Danmarkillu akornanni akiuunninngortikkusunnagu".
Sulisitsisut peqatigiiffiata GE-p siulersuisuini siulittaasup Henrik Lethip, aamma Demokraatit siulittaasuata tulliata Justus Hansenip Nunatta EU-mut ilaasortanngoqqissinnaanera oqaluuseritikkusullugu siornatigut oqaatigisimavaat.