GC Pituffimmi nutarterinermik suliassanik annaasaqartoq

Amerikamiut Pituffimmi sakkutooqarfianni siunissami kikkut kiffartuussinissaannik assortuussuteqarneq Greenland Contractors I/S-ip nutarterinissamik suliassanik ingerlatsinissaanut maanna aamma akornusersuutaalerpoq.

GC-mi sulisut katillugit 44-t soraarsinneqarpoq, taakkunannga amerlanerit assassorissanik suliaqartuupput maskiinalerisuullutillu Danmarkimi ulluinnarni najugaqartut. Tamannalu ingerlatseqatigiiffiup amerikamiut sakkutooqarfianni illuutinik pisoqalilersunik ingerlaavartumik nutarteriunnaarnissaanik pissuteqarpoq. 

Suliassat taakku GC-p kiffartuussinissamik isumaqatigiissutip saniatigut maannamut ingerlatarisimagaluarpai.

AAMMA ATUARUK Pituffimmi kiffartuussinissamik isumaqatigiissut US Air Forcep sivitsorusukkaa

Utaqqiisaasumik isumaqatigiissut akornusiivoq
Amerikamiut sakkutooqarfiata aamma Greenland Contractors I/S-ip kiffartuussinissamik isumaqatigiissutiminnik sivitsuinerat nutarterinermik suliassat ingerlanneqarnissaannut akornutaavoq.

Utaqqiisaasumik isumaqatigiissut nutaaq aappaagu marsip aallaqqaataata tungaanut atuutissaaq qaammatinillu arfinilinnik sivitsorneqarsinnaassalluni. Piffissarlu taanna nallertinnagu nutarterinissamik suliassat naammassineqarsinnaassanngillat.

- Silami suliassat taakku ukiuunerani ingerlanneq-ajorpagut, pinartullu kisiisa suliarisarlutigit. Marsip aallaqqaataata tungaannaanut piffissaqarpugut, naammassisinnaassaguttalu nutartigassanut atortussagut ullut 14-it matuma siorna maanga apuunneqareersimasariaqaraluarput, Greenland Contractors I/S-imi pisortaaneq, Peter Kofoed, KNR-imut taama oqarpoq.

Nutarterinissamik suliassat ingerlanneqartussaajunnaarnerat Greenland Contractorsip naatsorsuutaanut aamma sunniuteqartussaassaaq.

- Kaaviaartitavut taamatullu aamma isertitavut ikilissapput, Peter Kofoed oqarpoq, annaasaqaatigineqartussalli qanoq amerlatigissanersut oqaatigiumanngilaa.

Utaqqiisaasumilli isumaqatigiissuteqarnikkut nutarterinissamik suliassat annaaneqarnissaat naatsorsuutigineqareersimasoq pisortaanerup oqaatigaa.

Taamaammat sakkutooqarfimmi nutarterinissamik suliassat annertunerusut tamaasa maanna unitsinneqarallarput.

AAMMA ATUARUK Utaqqiisaasumik isumaqatigiissuteqarnissaq GC-p nuannaarutigaa

Soraarsitsisoqarnissaa naatsorsuutigineqareersoq
Eqqiaanermik sulisut akornanni aamma ikilisaasoqarpoq. Eqqiaanermi ikiortit katillugit arfinillit - tassalu sulisut pingasuugaangata ataaseq - suliunnaarsinneqarput. Tamannalu amerikamiut sakkutooqarfiata GC-mut isumaqatigiissutimini nutaami eqqiaasarnermik annikillisaasimaneranik pissuteqarpoq.

Eqqiaanermi ikiortit soraarsinneqartut amerlanerpaartaat Nunatsinneersuupput.

Eqqiaanermik sulialinnik aammalu nutarterinermik suliaqartunik soraarsitsisoqarnera Greenland Contractors I/S-imi sulisut sinniisuunerata Thomas Eisenhardtip uggoraa, tupaallaatiginngilaali.

- Ingerlatseqatigiiffik sorlerluunniit suliariumannittussarsiuussinermi toqqarneqaraluarpat isumaqatigiissutip annikillisinneqarnissaa ilisimareerparput. 

Thomas Eisenhardtilli erseqqissaatigaa sakkutooqarfimmi sulisut ataatsimut isigalugu nikeraattupilussuujuaannarsimasut. Sulisulli taarseraannerat ukiuni kingulliunerusini annikillisimavoq, ilaatigut nunarsuarmi aningaasarsiornikkut ilungersunartorsiortoqarnerata malitsigisaanik Danmarkimi sanaartornerup eqqugaasimanerata kingunerisaanik. Sulisulli taarseraannerat ukiumi kingullermi annertuseriaqqissimavoq Danmarkimi aningaasarsiornerup siumut-saakkiartornerata peqatigisaanik. 

Taamaakkaluartoq GC-mi sulisunut ukioq kingulleq imaannaasimanngilaq. 

- Exelisip (Services, aaqq.) isumaqatigiissummik tunineqarnera paasigatsiguli piffissaq nalorninartorfiusimavoq. Taamatut pisoqarnissaa sillimmartaarfigaarput aammalu ataatsimeeqatigalutigit (Exelis, aaqq.), isumaqatigiissummilli tunineqarnerat kingorna eqqartuussivimmit atortussaajunnaarsinneqarpoq. GC-llu ingerlaqqissinnaanera nuannaarutigineqarpoq, isumaqatigiissutilli taanna aamma killeqartussaavoq, Thomas Eisenhardt taama oqarpoq.