Pituffimmi GC-mi sulisut soraarsitaanissartik ernummatigissanngilaat

Pituffimmi ulluinnarni kiffartuussinissamik isumaqatigiissut Amerikamiut suliffeqarfiutaata 2015-imi oktobarip aallaqqaataanniit ukiuni arfineq marlunni atuuttussamik tigusussanngorpaa. Greenland Contractors Pituffimmi 400-t sinnerlugit sulisoqartoq, Pituffiup siunissami ingerlanneqarnissaanut aserfallatsaalineqarnissaanillu neqerooruteqartitsisoqarmat isumaqatigiissuteqarfigineqanngitsoorpoq. Taarsiullugu Amerikamiut suliffeqarfiutaat Vectrus isumaqatigiissuteqarfigineqarpoq. Greenland Contractorsimi pisortap Peter Kofoedip tamanna pakatsissutigaa.

Allattoq Elisa Isaksen

novembarip 02-at 2014 14:21

- US Air Force-imik aamma Namminersorlutik Oqartussanik ukiorpassuarni suleqateqarnitta unittussanngornera soorunami uggoraarput. 1971-imiilli piffissaq tamakkerlugu kiffartuussinissamik isumaqatigiissuteqartarpugut, taamaalilluni sivisuumik suleqatigiinnerput qaangiuttussanngorpoq.

- US Airforce-imit oqaatigineqartut naapertorlugit sullissisussanik neqerooruteqartitsinermi Vectrus akikinnerujussuarmik neqerooruteqarsimavoq, Greenland Contractorsip pisortaa Peter Kofoed oqarpoq, taassumalu Greenland Contractorsimi sulisut 400-t sinneqartut eqqissisarlugit oqaatigaa, sullissinissamik isumaqatigiissummik isumaginninnissamut ajorsaraluarlutik, tamanna sulisunut aallaqqaammut sunniuteqarnavianngitsoq.

Aamma atuaruk Greenland Contractors Pituffimmi sullissiunnaassaaq

- Sulliviit nikinnerinut atatillugu sulisut qanoq inissisimanissaannut Inatsisartut qujanartumik peqqussuteqarput. Taamaalilluni piginnittunngortut nutaat Pituffimmi sulisuvut akissarsiaat ullutsinni atuuttut pigitiinnarlugit sulisorilernissaannut pisussaaffeqarput, Peter Kofoed oqarpoq.

Taamaalilluni kiffartuussinissamik isumaqatigiissut nutaaq 2015-imi oktobarip aallaqqaataanniit atuutilerpat maanna sulisuusut suliinnarsinnaanissartik qulakkeeqqavaat. Tamatumali kingorna qanoq pisoqassanersoq Peter Kofoedip qularnaarlugu oqaatigisinnaannginnerarpaa.