Assi: KNR

GBU-p soraarsitsineranut Naalakkersuisut akuliunnianngillat

GBU-p nunanut allanut unammisartunut sungiusaasumik, ammip qalipaataanik immikkoortitsinermut eqqugaasumik, soraarsitsineranut tunngasunut Naalakkersuisut akuliunnianngillat.

Nunanut allanut unammisartunut sungiusaasuusimasoq GBU-p siulersuisuinit amerlanerussuteqartunit soraarsitaammat, GBU-mi siuilittaasuugallartup, Gert Fleischerip, soraarsitsineq ilaatigut Tekle Ghebrelulip GBU-mit akuerineqarani tusagassiuutinut oqaaseqarsimaneranik tunngaveqarnerarpaa. 

Taamaaliornerlu sungiusaasutut atorfeqarnermi isumaqatigiissummik unioqqutitsinerusoq Fleischerip oqaatigaa. 

Tassa Ghebrelulip killiligaanani oqaaseqarsinnaanini atorlugu Snapchatikkut aapakaatut banaanitortartutut saqqummiunneqarnini tusagassiuutitigut saqqummiussinini soraarsitaassutigaa. 

AAMMA ATUARUK GBU-mi siulittaasoq soraarsitsisoqareersoq tunuarpoq

Soraarsitsineq oqallisaaqisoq Randi Vestergaard Evaldsenip, Demokraatineersup, §37 naapertorlugu apeqquteqarnermini Naalakkersuisut soraarsitsineq qanoq isumaqarfigineraat apeqquteqarpoq. Tamannali kultureqarnermut naalakkersuisup Doris J. Jensenip akissuteqarfigiumanngilaa. 

Nunanut allanut unammisartut sungiusaasuata GBU-lIu akornanni atorfinitsitsinermut tunngasunik qanimut Naalakkersuisut ilisimasaqanngillat, taamaammallu oqaaseqarsinnaanatik, Doris J. Jensen allappoq.

- Naalakkersuisut suliamut tunngatillugu pisut erseqqinnerusut ilisimasaqarfiginngilaat, soraarsitsinermilu tunngavilersuutaasut tamakkiisuunersut oqaaseqarfigisinnaanagit. 

- Naalakkersuisullu GBU-p aamma GBU-p sulisuisa akornanni sulisunut tunngasorpianut oqaaseqarsinnaanngillat, Doris J. Jensen allappoq. 

Tekle Ghebrelulip sungiusaasutut atorfinitsinneqarnerani sungiusaasup GBU-llu isumaqatigiissutaat sapaatit akunneri marluk matuma siorna KNR-ip takuaa. Tassani paasinarsivoq Ghebrelulip tusagassiuutinut saaffiginninnginnermini GBU-p siulersuisuinut saaffiginneqqaartassasoq isumaqatigiissummi allassimanngitsoq. 
Taamaattoqarneratalu ersersippaa Gert Fleischer eqqunngitsumik oqaaseqarsimasoq. 

Gert Fleischer aggustip 18-ani KNR-imut nassuiaavoq Ghebrelulip isumaqatigiissutaa piffissami qanittumi aatsaat atuarsimallugu. Tassa Ghebrelulip isumaqatigiissummik unioqqutitsisimanerareerlugu taama nassuiaateqarpoq. 

Fleischerili Sermitsiaq.ag-mit ilumuunnginnerarneqarpoq. Gert Fleischer Sermitsiaq.ag-mit immiunneqarluni aggustip aallaqqaataani apersorneqarami oqarpoq Ghebelulip isumaqatigiissutaa atuareersimallugu soraarsitsinermullu tunngavigisimallugu.

AAMMA ATUARUK GBU-mi siulittaasuugallartoq eqqunngitsumik oqaluttoq

Naalakkersuisut ammip qalipaataanik immikkoortitsisarneq iliuuseqarfiginianngilaat

Vestergaard Evaldsenip Naalakkersuisunut apeqquteqarnermini ilanngullugu apeqqutigaa; Naalakkersuisut timersornerup iluani ammip qalipaataanik immikkoortitsisarneq akiorniarlugu iliuusissamik pilersaaruteqarnersut. 
Naalakkersuisulli politikkikkut iliuuseqarnianngitsut Doris J. Jensenip oqaatigaa, ajornartorsiummi tamanna aaqqinniarlugu suliniartoqarnerarlugu. 

- Kalaallit Nunaanni Timersoqatigiit Kattuffiat suliniuteqartoq Naalakkersuisut ilisimavaat, taamaammat Naalakkersuisut suliniuteqarnissamut pissutissaqanngillat, tamanna GIF-ip nammineq eqqumaffigalugu suliniuteqarfiginissaanik pilersaarmat, Doris J. Jensen Randi Vestergaard Evaldsenimut akissuteqarluni taama  allappoq.

AAMMA ATUARUK Arsaattartoq ammip qalipaataanik assigiinngisitsisoq

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!