Politikki

GA-p Vittus Qujaukitsoq akissuteqaqqugaa

Tallimanngorpat qinersisoqartussaavoq, nunattalu aningaasaqarnerata qanoq inissisimanera kikkunnit tamanit ilisimaneqartariaqarpoq. Vittus Qujaukitsoq nassuiaasariaqarpoq - kisitsisit missingersuutigineqartut qanoq inissisimappat? Kalaallit Nunaanni Sulisitsisut Peqatigiiffianni pisortaq, Brian Buus Pedersen, tusagassiorfinnut ullaaq manna nalunaaruteqarluni taama apeqquteqarpoq.

Allattoq Camilla Dam

novembarip 24-at 2014 10:49

Namminersorlutik Oqartussani kontut tamaasa, missingersuutit malinneqarnersut nakkutiginiarlugu Inatsisartut Aningaasaqarnermut ataatsimiititaliaanit nalinginnaasumik qaammatit pingasukkuutaarlugit misissorneqartarnerat pisortap innersuussutigaa.

- Ukiormannali missingersuutinik nakkutilliineq kingulleq suli saqqummiunneqanngilaq, naak kontunik nakkutilliineq Vittus Qujaukitsup naalakkersuisoqarfianit ingerlanneqareertoq. Kisitsisit Aningaasaqarnermut ataatsimiititaliamut ingerlateqqinneqarsimanngillat.

Aamma atuaruk Nunatta Karsia amigartooruteqarnersoq ataatsimiititaliami ilaasortaagallartup apeqqutigaa

- Sooq taamaaliortoqanngila, aningaasaqarnermut ataatsimiititaliami ilaasortat taama aperipput; amerliartuinnartullu aamma taama apeqquteqarput, - aamma GA taamaaliorpoq, peqatigisaanimmi 300 millionit koruunit tunngaannut missingersuutitigut amigartooruteqartoqarsimanera aamma oqaatigineqallattaarpoq.

- Taamaattoqarsimassappat ernumanartupilussuuvoq, ernumagisatsinniimmi aammalu Aningaasaqarnermut Siunnersuisooqatigiit nalunaarusiaminni kingullermi mianersoqqussuteqarnerattuulli Kalaallit Nunaammi aningaasaqarnikkut ajutoorsinnaanera taamaasilluni qaninneerarsuusimassaaq, Brian Buus Pedersen allappoq.

Qinersineq pingaarutilik

Kalaallit Nunaanni Sulisitsitsut Kattuffianni pisortap aningaasaqarnermut naalakkersuisuugallartoq, Vittus Qujaukitsoq, kisitsisit saqqummiuteqqullugit kajumissaarpaa.

- Inatsisartunut qinersisoqartussaavoq, taamaammat nunatta aningaasaqarnera kikkunnit tamanit ilisimaneqartariaqarpoq, taamaanngippat politikkikkut eqqunngitsumik toqqammaveqarluni ingerlanneqaratarsinnaavoq, Brian Buus Pedersen oqarpoq.

Aamma atuaruk Nunatsinni tunisat pisiallu oqimaaqatigiinneranni amigartoorutit ikileriarput

Ataatsimiititaliami ilaasortaq aamma taama apeqquteqarpoq
Taamaasilluni Inatsisartut aningaasaqarnermut akileraartarnermullu ataatsimiititaliaani ilaasortap Naaja Nathanielsenip (IA) apeqqutigisaanut assingusumik ujartuivoq. Taassumami paaserusuppaa ukioq nutaaq amigartooruteqarfiulluni aallartinneqassanersoq.

- Eqqaasitsissutigisariaqarpara, missingersuutinut malittarisassiami erseqqissumik allassimammat, missingersuutinik malittarinninneq ersersitsippat qaangiisoqarnissaa ulorianaateqartoq, taava Naalakkersuisunut ilaasortaq pineqartumut akisussaasoq pisussaammat missingersuutit eqquutsinnissaat qulakkeerniarlugu iliuuseqassalluni imlt tapiissutinik aningaasaliinissamut qinnuteqassalluni. Tamanna qinersereernissamut UTAQQISINNEQARTARIAQANNGIKKALUARPOQ. Tamannami akisussaassuseqanngitsuliornerussaaq, Naaja Nathanielsen tusagassiorfinnut nalunaaruteqarluni taama allappoq.

Aningaasaqarnermut ataatsimiititaliami ilaasortat Naaja Nathanielsenip saniatigut tassaapput Jens Immanuelsen (Siumut), Gerhardt Petersen (Atassut), Evelyn Frederiksen (Siumut), Per Berthelsen (Siumut), Kuupik Kleist (IA) aamma Hans Aronsen (IA).