Futsal: Malik Hermarij Sverigemi futsalimi ingerlalluaqaaq

Futsalimi målmanditut pikkorilluinnartoq Malik Hermarij Sverigemi klubbitaamini Athletic FC Eskilstunami aallartilluarpoq. Sverigemi nunanut allanut unammisartut sisamat klubbeqatigai ataaseq målmandiulluni. Taamaattoq Malik Hermarij unamminerni aallarteqqaartussani toqqagaasarpoq.

- Ukiumi unammiffiusumi Malik aallartilluaqaaq. Unammigaangatta isersimaqqaartuusarpoq. Ukioq unammiffiusoq ataaseq isumaqatigiissuteqarput, kisianni sivitsorneqarsinnaanera oqaluuserilereerparput, Athletic FC Eskilstunami sungiusaasoq Tekle Ghebrelul KNR-mut oqarpoq.

Taanna siornatigut Nuummi B-67-mi sungiusaasuuvoq aammalu futsalimi kalaallit nunanut allanut unammisartuini sungiusaasuulluni. Malik Hermarijip aappani nooqatigivaa aamma aallartilluartutut misigisimalluni.

- Oqaatsit aallaqqaammut nalunalaarput klubbimi aqutsisut arsaqatikkalu tuluttut oqaluunnerusarlugit. Maanna svenskit oqaasii sungiunneruakka aammalu maniinnera toqqissisimanaralugu, Malik Hermarij oqarpoq.

Oqaatsit sakkortuut

Klubbitaavani Athletic FC Eskilstunami unammineq sakkortuvoq. Klubbi taanna Sverigemi futsalimi pikkorinnerni siuartuuvoq klubbilli arlallit pointinik ikittuinnarnik appasinnerulaartut unammillertorujussuupput.

- Aallartinnera sakkortuvoq. Aamma tuikkut suliaritinnera pissutigalugu sivisujaartumik uninnganikuugama. Qujanartumik maannamut ingerlalluarpunga, Malik Hermarij oqaluttuarpoq.

Iligiit akornanni oqaatsit sakkortuut atorneqarsinnaasarput ligami unammisartunut toqqagaaniunneq sakkortummat.

- Sverigemi futsalertartutut unammisartunngorniassagaanni tamanna piareersimaffigisariaqarpoq. Iligiit sakkortuumik imminnut oqaluuttarput sungiusarnermilu tamaviaartoqartarluni, Tekle Ghebrelul oqarpoq.

Malik Hermarij una ukioq unammiffiusoq klubbitaaminissaaq sivitsuisinnaanerli klubbiata misissulereerpaa.