Frankrigimi sakkutuut BMW-mik aporneqartut
Parisip avataatungaani illoqarfimmi Levallois-Perretimi frankrigimiut sakkutuut arfinillit biilimit, BMW-mik meqqilimmit, aporneqarsimapput. Tusagassiorfiit arlallit taama ilisimatitsipput.
Asseq toqqorsivimmit
Allattoq Ritzau
aggustip 09-at 2017 07:14
Nutserisoq Simon Uldum -
Piaaraluni taamaaliortoqarsimanissaa qularutissaanngitsoq, borgmesteri Patrick Balkany, nutaarsiassaqartitsivik Reuters naapertorlugu taama oqarpoq.
Nutaarsiassaqartitsivik AP naapertorlugu, biilimik ingerlatsisoq qimaasimavoq politiillu biili maanna ujaarileruttorpaat.
Ullaap tungaani nalunaaqutaq arfineq-pingasut missaani apuisoqarnerani sakkutuut arfinillit ajoquserput, taakkunannga marluk ajoquserujussuarlutik.
Apuisoqarneranullu suna pissutaasimanersoq suli nalunaarutigineqanngilaq.
Frankrigimi saassussinerit arlallit ukiuni kingullerni pisarput, ilaatigut Nicemi 2016-imi, taamani angutip lastbiili atorlugu inunnik arlalissuarnik apuilluni toqutsivoq.
