Obama: Silaannaap allanngoriartornera akiorniarlugu sorsuttuaritsi
Præsidentitut suliniutimi tapersersortaanit aamma nanginneqarnissaat oqalugiarnermini ilaatigut kajumissaarutigaa.
- Silap pissusiata allanngoriartornerata akiorniarneqarnissaa oqallisigisariaqarparput, Obama, Chicagomi oqalugiarnermini oqarpoq, nangillunilu:
- Ajornartorsiulli pillugu misiartariaqanngilagut. Ajornartorsiutit kinguaariit tulliinut ingerlateqqittaqanngilagut. Killuussisutut isigineqassaagut taamaaliorutta. Nutaaliorsinnaasariaqarpugut, siuaasattalu ajornartorsiutinik aaqqiiniartarnerat ingerlateqqittariaqarparput, Obama oqarpoq.
Immikkut ilisimasallit politikerillu amerlasuut silap pissusiata allanngoriartornera ernummatigalugu oqaatigisarsimavaat, silalli pissusiata allanngoriartornera upperinagu, præsidentinngortussap Donald Trumpip qasseerpassuariarluni oqaatigisarsimavaa.
Præsidentitut sulinermini angusimasani Obamap oqalugiarnermini ilaatigut aamma iserfigai. Tusarnaartut nuannaarutigeqisaannik præsidentitut qineqqusaaqqaarnermini oqaasinnaani "Yes we can", aap, pisinnaasorsuuvugut, allanngortilaarlugu oqarpoq: "Yes we did", aap, anguniakkavut anguagut. Tusarnaartut nikuillutik Obama kingorna ersaartaappaat.
Ajornartorsiutilli USA-mi suli atuuttut Barack Obamap aamma eqqartorpai, soorlu ammit qalipaataannik assigiinngisitsinerup USA-mi suli atuunnera Obamap eqqaavaa, ajornartorsiullu qaangerniarneqarnissaanut iliuuseqartoqartariaqarnera eqqaallugu.
