F 16-it misiliinerat iluatsinngilaq
Siunissami Issittumi F 16-inik atuisoqannginnissaa illersornissamik suliaqartut isumaliutigaat, tamannalu annaassiniartarnernut nakkutiilliinermullu sunniuteqarsinnaassaaq.
Allattoq Elisa Isaksen
aggustip 10-at 2014 11:13
Sakkutuut timmisartui malersuutit F-16-it siullermeerlutik Nunatta silaannartaatigut misileraalluni qanittukkut timmitinneqarput. Misileraanerulli ilaa taamaatiinnarneqartariaqarsimavoq amma siunissami timmisartut malersuutit taamaattut Nunatsinni atorsinnaanissaat ajornakusuussaqaaq.
Sakkutuut timmisartortartut nittartakkamut Ingeniøren.dk-mut taama oqarput.
Timmisartut malersuutit maluginiutaasa nutaat F-16-inut ikkullugit misilerarnissaat pilersaarutaaqqaaraluarpoq. Illersornissamimmi suliaqartut taamaalillutik Nunatta imartaanik nunataanillu nakkutilliinerminni atortutik nutartersinnaaniassammatigik. Atortorissaarutilli nutaat timmisartuni malersuutini inissaqarsimanngillat.
Timmisartut malersuutit miffigisinnaasaasa tassa Kangerlussuup aamma Pituffiup akornanni 1.313 kilometerinik isorartussuseqarmat, malersuutini aquttut benziinamik atuinertik nakkutigiuartariaqaraat, sakkutuunit timmisartortartunit oqaatigineqarpoq. Taamaattumik timmisartut malersuutit assiliivinnik allanillu atortulersornissaat taamaatiinnarniarlugu aalajangiunneqarsimavoq.
Malersuutit F-16-it atorlugit isorartuumut timmisinnaanerup taama ajornakusoortiginissaa illersornissamik suliaqartut tupaallaatigaat. Taamaattumik malersuutit F-16-it maani takussaanerulernissaat ilimagisariaqarunanngilaq.
- Taama ingerlatsisinnaanissamut unammillernartoqaqaaq, timmisartunillu taamaattunik Kalaallit Nunaanniititaqarnissaq immaqa tulluartuunngilaq. Tassami sumunnassagaluaraangattaluunniit naammattunmik orsussaqarnissaq anersaartuutinullu sillimaniarnissaq isumagineqaqqissaartariaqartut, Søren Andersen Ingeniørenimut oqarpoq.
