Kalaallit Nunaata isornartorsiuinera Savalimmiormiunit tapersersorneqarpoq
Danmarkip Kalaallit Nunaannik Savalimmiunillu Naalagaaffeqatigiinnermi iliuuserisai piffissap sivikitsup iluani aappassaa taama isornartorsiorneqarput.
AAMMA ATUARUK Danmarkip anneruniarnera aserorsaataalluinnarpoq
Nunanut allanut tunngasunut naalakkersuisup Vittus Qujaukitsup aviisimit Politikenimit siullermik apersorneqarnermini ilaatigut oqaatigaa Danmark nunatsinnnut anneruniartoq, Amerikamiullu Pituffimmiit anisinnissaannik sioorasaarlugit.
Savalimmiunilu naalakkersuisut siulittaasuat Aksel V. Johannesen maanna aamma isornartorsiuilerpoq, Danmarkip naalagaaffeqatigiinnermi pissusilersuutai isornartorsiorlugit.
Danmarkip tunngaviusumik inatsisini aallaavigalugu akisussaaffinnik tunniusserusunngitsoq, Savalimmiormiut naalakkersuisuisa siulittaasuata isornartorsiuinermini oqaatigaa, Vittus Qujaukitsorlu isornartorsiuineranut tapersersuilluni.
- Danmarkip tunngaviusumik inatsisaata Savalimmiut nammineq aalajangiisinnaassusiannut killilersuinermut atorneqarsinnaanngitsoq, Savalimmiormiut isumaqarput, Aksel V. Johannesen Politikenimut oqarpoq.
Savalimmiormiut naalakkersuisuinit taama isornartorsiuisoqarnera immikkut maluginiagassaasoq Politikenip allaaseraa. Savalimmiormiummi Danmark pillugu oqaaseqaraangamik annerusumik isornartorsiuineq ajorput, partiillu socialdemokratiskiusup Javnadarflokkurinip Naalagaaffeqatigiinnermik tapersersuisup taama isornartorsiunera immikkut aamma maluginiagassaasoq oqaatigaat.
AAMMA ATUARUK Savalimmiut Nunatsinnit ingerlalluarneruvoq
