EU-mut aalisagartassiissutit ikinnerussapput
Aalisarnermut piniarnermullu naalakkersuisoqarfimmi atorfilittat Nunatta imartaani 2017-imi aalisagartassiissutissat isumaqatiginniutigisimagaat tusagassiuutinut nalunaarummi taama allapput.
Naalakkersuisoqarfik naapertorlugu aalisartut europamiut ikinnerusunik raajartassinneqarlutillu suluppaagartassinneqarput, amerlanerusunilli saarullittassinneqarlutik.
Raajartassiissutit 950 tonsinik ikilineqarput, suluppaagartassat 836 tonsinik ikilineqartut, pisarisuukkallu 226 tonsinik ikilineqarlutik. Taarsiullugu aalisartut europameersut Kalaallit Nunaata imartaani saarullinnik 400 tonsinik amerlanernik pisaqarsinnaallutik.
Atorfilittat EU-mut isumaqatigiissutaat aalisarnermut piniarnermullu naalakkersuisumut Hans Enoksenimut saqqummiutissavaat, taassumallu pisassiissutit nutaat atuutilersinneqannginneranni akuereqqaassavai.
Aalisarnermut Piniarnermullu naalakkersuisoqarfimmi immikkoortortaqarfimmi pisortaq Emanuel Rosing Nunatsinnit aallartitani siuttorineqarpoq. Immikkoortortaqarfimmilu atorfilittat saniatigut Kalaallit Nunaanni Aalisarsiinnaanermut Akuersissutinik Nakkutilliisoqarfik, Pinngortitaleriffik, Aningaasaqarnermut immikkoortortaqarfik aalisarnermillu inuussutissarsiuteqartut tassani aamma aallartitaqarput.
Naqqiut: KNR siullermik allakkaluarpoq, EU-p nunattalu isumaqatigiissutaat 222 millionit koruuninik naleqartoq. Kisitsisillu taakkua eqqortuunngillat. Kukkunerput ajuusaarutigaarput.
