EU: Grækerit pillugit pilersaarut alloriarneruvoq - sulili pitsaanerusumik angusassaqarluni

Grækenlandip aningaasarliornerata annaateriarnissaa pillugu ilorraap tungaanut aqqutissiuussisumik, grækerit namminneerlutik aaqqissuusseqqinnissamut siunnersuutaat siumut alloriarnertut isigisariaqartoq, EU-p kommissioniani siulittaasup tullia euro-nullu tunngasunut akisussaasoq, Valdis Domkrovskis oqarpoq.

Taanna EU-mi nunat ilaasa 19-iusut aningaasaqarnermut ministeriinik Bruxellesimi ullumi arfininngornermi pingaaruteqarluartumik ataatsimeeqateqassaaq.

- Siuariartortoqarnera takusinnaalluarparput. EU-mi nunat ilaannit apeqquterpassuit suli akissutissarsineqanngillat aamma taakku aaqqiisoqarnissaanik apeqqusiipput, Valdis Domkrovskis oqarpoq.

Grækenlandimut immikkut tapiissusissoqarnissaa pillugu aalajangiinermi, EU-mi nunat ilaanni aningaasaqarnikkut ministerit ullumi ataatsimiinnerminni aappiissapput naameerlutilluunniit.

Grækerit naalakkersuisuisa aaqqissuusseqqinnissamik siunnersuutertik, sisamanngormalli unnukkut aningaasanik attartorfigisaminnut nassiuppaat tassaasunut EU, europami nalaagaaffiit aningaaserivissuat aamma nunat siuarsagassat taarsiagassarsiniartarfiat, IMF.

Aaqqissuusseqqinnernut siunnersuutit nassiunneqareersullu, Athenimi naalakkersuisut neriuuteqarput, atukkiinissanut nutaanut ammaanneqarnissaminnik, taamaalilluni euromik aningaasaqarnertik aamma nunap aningaasaqarnerata annaanneqarnissaa qulekkeerneqassalluni.