Erik Jensen Inatsisartunit ullumi akuerineqassaaq
Martha Lund Olsen Naalakkersuisunit januaarip 27-ani soraarsitaammat suliassaqarfiit Muté Bourup Egedemut (IA) isumagisassanngortinneqartut sisimiormiup Siumumeersup Erik Jensenip akisussaaffigilissagai sisamanngormat nalunaarutigineqarpoq.
Erik Jensen taamaalilluni kommuninut, nunaqarfinnut, isorliunerusunut, attaveqaqatigiinnermut ineqarnermullu naalakkersuisutut Inatsisartunit ullumi ataasinngornermi akuersissutigineqartussanngorpoq.
Erik Jensenip naalakkersuisussatut toqqarneqarneranut ukiorpassuarni inissiaatileqatigiiffimmi INI-mi atorfeqarsimanera Kim Kielsenip tunngavilersuutigaa. Erik Jensen kommunimut qinersinermi Qeqqata Kommuniani kommunalbestyrelsimut qinigaavoq kommunimilu Siumumi qinigaanerpaat tulleralugu - borgmesterinngortussamit Malik Berthelsenimit qaangerneqaannarluni.
Innarluutillit illersuisoqarfiannik pilersitsineq
Innarluutillit illersuisuannik pilersitsinissaq Inatsisartut kingusinnerusukkut oqaluuserissavaat - Innarluutillit illersuisoqarfiannik pilersitsinissaq matumani pineqarluni.
Innarluutillit illersuisuannik pilersitsinissaq Nunatsinni innuttaasut innarluutillit pisinnaatitaaffiisa nukittorsaavigineqarnissaannik siunertaqarpoq, isumaginninnermut naalakkersuisoq Sara Olsvig saqqummiussissummini taama allappoq:
- Innarluutillit illersuisoqarfiannik pilersitsineq takussutissaavoq, Naalakkersuisut Naalagaaffiit Peqatigiit innarluutillit pillugit isumaqatigiissutaannik innuttaasunut innarluutilinnut ajornaatsumik qanilaartumik atuutilersinneqarnissaa pingaartikkaat, naalakkersuisoq taama allappoq.
Peqqissutsimut naalakkersuisup atornerluineq pillugu inatsisissatut siunnersuutaa Inatsisartut aamma oqaluuserissavaat.Ullormut oqaluuserisassat tamakkerlugit nittartakkami inatsisartut.gl-imi atuarneqarsinnaapput.