NunaMinerals ingerlaannarnissaa periarfissaqalaartoq
Tamannali pissappat, suliffeqarfimmut tuluit aningaasaliinissaat pisariaqartinneqarpoq, tamannali aatsaat paasinarsissaaq NunaMineralsip piginneqataasalu, novembarip naalernerani ileqquusumik ataatsimeersuarpata.
Taama KNR-imut oqarpoq aatsitassarsiorfiup pisortaa, Ole Christiansen. Suliffeqarfiulli aallarteqqinnissaa piviusunngussappat tamanna aktie-aatilinnut annertuumik annaasaqaataassasoq taanna oqarpoq.
- Annaassiniarneq ilumut iluatsissinnaanersoq nalorninarpoq, Nuna Mineralsip pisortaa Ole Christiansen oqarpoq imalu itisiliilluni.
Aamma atuaruk NunaMineralsip ukiumoortumik nalunaarusiani saqqummiukkaa
- Aktietillit immaqa annikikkaluartumik naleqartitsinissaat aamma anguniarneqarpoq. Taavalu aamma misissorneqarluni NunaMineralsip akiitsui assigiinngitsunut qanoq akilersorneqarsinnaanersut.
Suliffeqarfik akiliisinnaajunnaarnermit annaanneqassappat NunaMineralsip siulersuisui aaqqiissutissanik arlalinnik siunnersuuteqarput.
Ilaatigut suliffeqarfik akiliisinnaajunnaarneranit annaanneqassappat, aktie-aatit iluanaarutigineqarnissaat appariagaatsiarneqartariaqartoq, taamaalillunilu piginneqataasut tamarmik aningaasanik annaasaqartariaqassallutik, Ole Christiansen oqarpoq.
Aamma atuaruk Aviisi: NunaMinerals USA-mi aatsitassarsiorfinnik ingerlatsissasoq
- Aporfissarpassuupput suli. Ataatsimut isigalugu suli nalorninartut arlaliupput. Taamaattumik pingaarnerpaassaaq NunaMineralsimi aktietillit ukununnga siunnersuutinut saqqummiunneqartunut qanoq isummernissaat. Tassa imaakkami aktietillit pingasuuppata marluk sinnerlugit akuersippata aatsaat una iluatsissinnaagami.
NunaMineralsip pisortaa, Ole Christiansen oqarpoq. Taassuma aamma oqaatigalugu, aatsitassarsiorfik siunissami ingerlaannassappat suliffeqarfik tulunnit ilaatigut aningaasaliisoqarluni ingerlanneqarsinnaanera periarfissiilaartoq.
NunaMinerals A/S-ip ileqquusumik ataatsimeersuassaaq novembarip 25-anni. Tamannalu ingerlanneqassalluni Nuummi Hotel Hans Egedemi ualikkut nalunaaqutaq sisamaniit.
