IKIORTARIALLIT Ellemannip kalaallinut immikkut suliniutit aqqutissaasorinngilai
Kalaallit arnat danmarkimiittut inooqataaniarnikkut ajornartorsiortut inuunerminni atugarlioqisut Inooqataaniarnikkut ajornartorsiortut pillugit Siunnersoqatigiit nalunaarusiaata inerniliuppaa.
Kalaallit inooqataaniarnikkut ajornartorsiortunut immikkut suliniutinik pilersitsisoqarnissaanik aningaasaliisoqartariaqartoq siunnersuisoqatigiinni siulittaasoq, Jann Sjursen, isumaqarpoq.
Aamma atuaruk Siulittaasoq: Atornerlugaasimanerminnik kingunerlutsitsisut danskinit ikiorneqartariaqarput
Nalunaarusiarlu atuassallugu alianartoq, isumaginninnermut ministeri, Karen Ellemann oqarpoq.
Taamaattoq kalaallit atugarliortut danskisut innuttaassuseqarmata, immikkut pisinnaatitaaffeqarnissaat Karen Ellemannip tulluarsorinngilaa.
- Isumaginninnikkut immikkoortumik aaqqissuussinissaq aaqqiissutissaasorinngilara. Danskit naalakkersuisuisa tungaannit isumaqarluinnarpugut danskisut innuttaasuseqartut tamarluinnarmik assigiinnik pisinnaatitaaffeqartussaasut. Suminngaanneerneq apeqqutaassanngilaq, Karen Ellemann KNR-imut oqarpoq.
Aamma atuaruk Kalaallit arnat pillugit ataatsimeersuarneq soqutigineqarluartoq
Kalaallit inooqataaniarnikkut ajornartorsiortut kommuninit ikiortinnissamut neqeroorutigineqartunik atuinissaminnut akimmiffeqartartut, nalunaarusiami aamma atuarneqarsinnaavoq.
Kalaallillu atugarliortut inuunerat pitsaanerulersinniarlugu immikkut suliniuteqarnani ikiortinnissamut neqeroorutaareersunik atuinerusalernissaannik ikiorneqassasut, Karen Ellemann isumaqarpoq.
- Paarlattuanilli suliniutit pisoreersut kalaallinit pissarsiaqarfigineqarnerunissaat sulissutigissavarput. Matumanilu Kalaallit inooqataaniarnikkut ajornartorsiortut pillugit periusissiami misilittagarineqartut pitsaasut aallaavigerusuppakka, Karen Ellemann oqarpoq.
Aamma atuaruk Nalunaarusiaq: Kinguaassiutitigut atornerlugaareersimanertik erloqissutigisaraat
Kalaallit Danmarkimiittut atugarliortut Danmarkimi inuiaqatigiinnut akuunerulernissaat periusissiap siunertaraa.
Kalaallillu atugarliortut inuunerisa pitsaanerulersinnissaat anguniarlugu periusissiaq atorluarneqarsinnaasoq, isumaginninnermut ministeri isumaqarpoq.
- Siullertut, kalaallit inooqataaniarnikkut ajornartorsiortut pillugit periusissiami misilittakkat satspuljemut tunngatillugu ukiaru eqqartortussaavagut. Danmarkimi ilisimasallit kalaallillu Danmarkimi sinniisaasa pitsaanerusumik angusaqarnissatsinnut siunnersuutaat matumani ilanngutissavakka, Karen Ellemann oqarpoq, nangillunilu.
-Aappaattullu, Danmarkimut nuunnermi pitsaasumik inuuneqalernissaminnut pisariaqartitaminnik toqqammavissaqartut amerlanerusariaqarput. Suliaq taanna Kalaallit Nunaanni aallartissaaq, taamaammat Kalaallit Nunaannut sapaatit-akunneri marlussuit qaangiuppata tikeraaruma isumaginninnermut naalakkersuisoq Martha Lund Olsen tamanna pillugu oqaloqatiginiarpara, isumaginninnermut ministeri Karen Ellemann oqarpoq.
