Dorph: Akitsuutit pinnagit mittarfissualiortoqarli
Qaasuitsup Kommuniata aningaasaqarniarnera maanna ilungersunartumik inissisimareersoq, ikummatissat akiisa akitsornerisigut suli qajannarnerulissasoq, borgmester Ole Dorph isumaqarpoq.
Akinik qaffaanikkut inunnut avannaani isertitakitsunut aamma aalisartunut piniartunullu, Nunatta isertitarisartagaanut angisuumik pilersueqataasunut eqquissaaq, Ole Dorph tusagassiuutinut nalunaarummini allappoq.
Aamma atuaruk Uldum: Uuliap akitsuuserneqarnissaa inuiaqatigiinnut akeqassanngilaq
Borgmesteri Siumumeersoq taanna isumaqarpoq, Naalakkersuisut Nunatta karsiata amigartoorutissai Namminersorlutik Oqartussani aaqqissuusseqqinnikkut nassaariniarneqartariaqartut.
Tamatuma saniatigut Ole Dorphip tigussaasumik tikkuarpaa, takornariartitsineq aningaasanik isaatitsivigineqarsinnaasoq.
Aamma atuaruk PolarOil: Uliap qanoq akikillitiginissaa naluarput
Ole Dorphip pingaartitani tamatumunnga atatillugu saqqummiuppaa - tassa Ilulissani timmisartorsuarnut mittarfiliortoqarnissaa.
- Ilulissat mittarfiata tallineratigut sullivinnik amerlanerusunik pilersitsisoqassaaq, tamannalu Nunatta sinneranut siaruaatissalluni, borgmesteri oqarpoq.
Ikummatissat akitsuutaannik qaffaaniarneq allanik aamma akitsuutinik qaffaanikkut Nunatta karsianut 96 millionit koruuninik isertitsissutaasussatut takorloorneqarpoq.
