Uldum: Uuliap akitsuuserneqarnissaa inuiaqatigiinnut akeqassanngilaq
Uuliap akitsuuserneqarnissaanik Naalakkersuisut siunernsuutaat paartiinit tamarluinnagajannit, Inuit Ataqatigiit kisimik pinnatik, isornartorsiuipput.
- Naalakkersuisunit naatsorsuutigaarput, Polar Oil uuliamik tulliani pisiaqaruni tamanna iluanaarutaassasoq - taamaalillunilu atuisartut suliffeqarfiillu akitsuutip qaffanneqarnerani aningaasatigut artukkerneqannginnissaat naatsorsuutigalutigu, Aningaasaqarnermut Naalakkersuisoq, allappoq.
Naalakkersuisut akitsuummik qaffaaniarnerat ulluni kingullerni oqallisaagaatsiarpoq, ilaatigut naalakkersuisuutitaqartut partiit Inatsisartuni ilaasortaatitaannit isornartorsiorneqarluni.
- Tassunga atatillugu oqallinnermi pingaartitatut taamaassorisaq suujunnaarsikkusuppara - tassalu akitsuutissatut siunnersuut innuttaasunut suliffeqarfinnullu annertuumik nammagassiissutaanissaanik oqallinneq, Andreas Uldum allappoq imalu nangilluni.
- Polar Oil tulliani uuliamik pisissaaq, 2016-imi upernaap ingerlanerani. Tamatumuuna uuliap akiata annertuumik appartinneqarsimanissaa Naalakkersuisunit naatsorsuutigaarput, tassami uulia nappartamut ataatsimut akigitinneqartartoq ukiut kingulliit marlussuit iluanni appartinneqartarmat, Aningaasaqarnermut Naalakkersuisoq allappoq.
Andreas Uldumip tamatumunnga assersuutigaa, 2014-imi septembarimit 2015-imi septembarimut uulia naappartumut ataatsimut akigitsinneqartoq 91,5 dollarsiniit 44,5 dollarsimut appartinneqarsimanera.
Aviisip Børsenip allaaserisaa naapertorlugu, uulia nappartamut ataatsimut, aasaq juulimi akeqarpoq 53 dollarsit missaanik, tassalu danskit aningaasanngorlugu 350 koruunit missaannik.
- Erseqqissaatigissavarali, Polar Oil tulliani uuliamik pisippat, tassa 2016-imi upernaakkut, uuliap nappartaq ataaseq qanoq akeqassanersoq, Naalakkersuisunit ilisimasaqanngimmat. Taamaattorli uulialerinerup iluani ilisimasaqartut misissueqqissaartartullu tamarmik tupaallassapput, uuliamut nappartamut ataatsimut akigititaq, Polar Oil-ip kingullermik pisiaqarneratulli akeqassappat, Andreas Uldum allappoq.
Taanna aamma allappoq, uuliamut akitsuutip qaffanneqarneratigut avatangiisit silallu pissusaata innarlerneqannginnerunissaat anguneqassammat.
