VIDEO Doris Jakobsenip hashi pillugu oqaatigisaasa ilaat tunngavissaqanngitsut
Peqqissutsimut naalakkersuisup Doris Jakobsenip (S) Qanoruumi pingasunngormat oqaatigaa Amerikami naalagaaffimmi Coloradomi haship inerteqqutaajunnaarsinneqarnerata kingorna meeqqat atornerluisuunertik pissutigalugu toqusartut amerleriarsimasut. Aamma biilertillutik ajutoortartut amerlisimanerannik pinerluttuliortoqartarneratalu qaffassimaneranik kinguneqarsimanerarpaa.
- Assersuutigiinnarlugu Colorado, tassani takuneqarsinnaavoq ikiaroornartoq inerteqqutaajunnaarsinneqarmat meeqqat toqquteqartartut amerlipput ikiaroornartoq pissutaalluni. Kisianni aamma biilinik ajutoortartut amerlipput, taavalu aamma pinerlunniartarnerit qaffarujussuarput. Tamannalu inuiaqatigiinni akissaqartinngilarput, peqqissutsimut naalakkersuisoq, Doris Jakobsen, KNR-imut taama oqarpoq.
Oqaatigisaalu uissuumminartuummata Qanoruup ilumoornersut misissorpai.
Naalagaaffiup inatsisinik atuutitsinermut oqartussaasui Senatimut ukioq manna marsip qaammataani nalunaarusiaat nassaaraarput.
Tamatumunngalu peqatigitillugu Doris Jakobsen peqquarput oqaatigisani uppernarsaqqullugit.
Nalunaarusiaq "Marijuana Legalization in Colorado: Early Findings" tamakkerlugu uani atuarneqarsinnaavoq.
Meeqqat toqusartut amerleriarsimanngillat
Oqaatigisaalu uissuumminarnerpaaq siulliuteriartigu. Oqaatigaami haship inerteqqutaajunnaarsinneqarneratigut meeqqat toqusartut amerleriarsimasut. Taamaattoqanngilluinnarporli. Taamaattoqarneranimmi nalunaarusiami sumiluunniit allassimasoqanngilaq.
Qanorooq Peqqissutsimut naalakkersuisoqarfimmit ippassaq nalunaaqutaq 11:14 nalunaarusiamik nassinneqarpoq, naalakkersuisullu oqaatigisai tassani uppernarsaatissaqartinneqartut oqaatigineqarluni. Meeqqalli toqusartut amerlisimanerannik oqaaseqarnera tassani aamma uppernarsaatissaqanngilaq. Arlaleriarluta saaffiginnereerluta KNR nalunaaqutaq 15.38 nalunaarusiamik allamik nassinneqarpoq, nalunaarusiaq kukkusoq uatsinnut nassiunneqartoorsimasoq oqaatigineqarluni. Nalunaarusiarli Qanoruup misissuinermini aallaavigisaanit pisoqaanerungaatsiarpoq. Meeqqat toqusartut amerleriarsimanerat aamma tassani eqqaaneqanngilaq.
Aamma atuaruk Doris: Hashimik inerteqqutaajunnaarsitsinerup pinerlunniartartut amerlisissavai
Biilinik ajutoortut amerlanerupput - pinerluttuliortoqartarnera qaffassimanngilaq
Biilinilli ajutoornerit amerleriarsimanerat ilumoorpoq. Biilertillutik ajutoortut aavisa cannabissimik akoqarnerannik paasisaasut 44 procentinik amerleriarsimapput.
Pinerluttuliortarnerup qaffakkiartorneranut tunngatillugu, nalunaarusiami nutaajunerpaami atuarneqarsinnaavoq pinerluttuliortoqartarnera appariaateqalaarsimasoq. Nakuuserluni pinerluttuliornerit 2009-miilli 6 procentinik ikileriarsimapput tillinniarnerillu 3 procentinik ikileriarsimallutik.
Aamma nalunaarusiaq Doris Jakobsenip innersuussutigisaa Coloradomi pinerluttuliortarnerup qaffariaateqarsimaneranik takussutissartaqanngilaq. Allanngorpiarsimanngilaq. Illoqarfiilli pingaarnersaanni Denverimi 2012-imit 2014-imut 12 procentinik qaffariaateqarsimavoq.
Aamma atuaruk Naalakkersuisut maligassiuerusupput
Aamma atuaruk Naalakkersuisut hashitorsimanersut paasiniarlugu qoorsiortilersut
