Angut hashi pillugu suliami immikkut tigummigallagaasoq
Tigusarineqartut qulit Kalaallit Nunaanni najugaqarput ataaseq Danmarkimi. Angut 30-it missaannik ukioqartoq Danmarkimi tigummigallagassanngortinneqarpoq arfinillit Nuummi tigusarineqarlutik sisamallu iperagaallutik.
Tigusarineqartuni ataaseq immikkoortitaalluni parnaarunneqarpoq, sinnerilu tallimat sapaatit akunnerini sisamani tigummigallagassanngortinneqarput aggustip ulluisa 22-ata tungaanut, Kalaallit Nunaanni politiit unnerluussisussaatitaasuneersoq Tobias Berg oqarpoq.
AAMMA ATUARUK Ikiaroornartoq pillugu suliami inuit aqqanillit tigusarineqartut
Tigusarineqartut ikiaroornartumik hashmik kilonik arlalinnik oqimaassuseqartumik eqqussisimasutut pasineqarput.
- Ikiaroornartoq hash 10 kilo sinnerlugit oqimaassusilik eqqunneqarsimavoq qassi kiloqqissaajunarsoq oqaluttuarisinnaanngilara, Tobias Berg politiineersoq oqarpoq.
- Pasineqartut ikiaroortut pillugit inatsisinik sakkortuumik unioqqutitsisimasutut pasineqarlutik tigummigallagassanngortinneqarput.
Nuummi tigummigallagassanngortinneqartut saniatigut, angut 30-it missaannik ukiulik Danmarkimeersoq tigummigallagassanngortinneqarpoq, taannalu Nuummut tikippat, aqagu sisamangorpat 27 juli sapaatilluunniit akunnerata ingerlanerani eqqartuussivimmut sassartinneqassasoq, Tobias Berg oqarpoq.
Kalaallit Nunaanni politiit annertunerusumik paasissutissiisinnaanngillat, paasiniaanerit suli ingerlammata.