Tillie Martinussen: Demokraatit naleqartitaat malinneqanngillat
Partiip aqunneqarnera politikikkullu ingerlanneqarnera tapersersorsinnaajunnaarlugu ilaasortaajunnaarpoq.
Taama isornartorsiusoqarnera Demokraatit siulittaasuata Randi Vestergaard Evaldsenip ilumuunnginnerarpaa.
- Partiip qanga anersaava tarninga politikkialu ilisarisinnaanngilakka, Tillie Martinussen siornatigut inatsisartuni ilaasortaasimasoq aamma Demokraatit immikkoortortaqarfianni Demokraatit Sermersooq Kitaani siulittaasuusimasoq taama oqarpoq.
Tillie Martinussenip partiimit ilaasortaajunnaarpoq arfininngornermi, immikkoortortaqarfimmi siulersuisuni ilaasortaqataa alla Nivi Frenderup- Strunz aamma partiimit anivoq.
Qaammatit kingulliit ingerlanneranni Demokraatit Sermersooq Kitaani ilaasortat arfineq marluk partiimit tunuarput, ilaasortaajunnaarlutik.
AAMMA ATUARUK Tillie Martinussen Demokraatinit tunuarpoq
Tillie Martinussenip oqarnera naapertorlugu Demokraatit politikkiat isumaqatigisinnaajunnaaramiuk ilaasortaajunnaarpoq.
Partiip imaluunniit politikkikkut ingerlanneqarnera tapersersorsinnaanngilluinnarpara, ullormiit ullormut allanngorarpoq, Demokraatit politikkikkut sulissutiginiartagaannik ingerlatsisoqanngilaq, uanga tapersersorsinnaasannik, Tillie Martinussen oqarpoq.
Taassuma assersuutitut taavai, raajartassanik agguuaasseriaatsip allanngortinneqarnera aamma akiitsunik akiliisitsisarnermik aaqqissuussamik Ilanngaassivimmik atuutilersitsiniarluni politikki, Demokraatit liberalimik eqqarsarlutik tunngavigisaannut naleqqutinngitsoq Tillie Martinussen oqarpoq.
AAMMA ATUARUK Demokraatit immikkoorutaat ersikkunnaariartortoq
Partiip politikikkut naleqartitai qimanneqartut Demokraatit partiianni siulittaasup Randi Vestergaard Evaldsenip ilumuunnginnerarpai
- Pingaartitagut allanngornikuunngillat, pingaartitagut taakkuujuaannarput, Kalaallit Nunaat tamaat sullipparput, taannalu aamma siunertariuaannarparput, Demokraatit siulittasuat Randi Vestergaard Evaldsen oqarpoq.
Partiip politikkikkut pingaartitai naleqartitaalu allanngoriaateqalaarsimasut partiip siulittaasuata uppernarsarpaa.
- Aap allannguuteqartoqarnikuuvoq, Kalaallit Nunaat tamaat isigalugu sulilernikuuvugut, Demokraatit immikkoortortaqarfii sinerissamiittut aatsaat taama amerlatigipput, aap allannguuteqartoqarnikuuvoq nunat tamaat sulilernikuuvugut, Demokraatit siulittaasuat taama oqarpoq,
AAMMA ATUARUK Michael Rosing matu matorluutigalugulu Demokraatinit tunuartoq
Tillie Martinussen aamma isumaqarpoq, partiimi siulersuisuunerit Demokraatit Semersuup kitaani aalajangigassanik arlaleriarlutik akuliuttarsimasut partiillu aalajangersagaanik unioqqutitsisarsimasut.
Partiip aalajangersagaanik partiip siulersuisut unioqqutitsisarsimanerannik oqarneq Randi Vestergaard Evaldsenip ilumuunnginnerarpaa
Tillie Martinussenip politikikkut sulinera siunissami qanoq ikkumaarnersoq taassuma suli qulakkeerlugu oqaatigisinnaannginnerarpaa.
Demokraatini politikikkut qanga naleqartinneqarsimasut suli pingaartitaraakka, taamaattumik takorloorsinnaanngilara partiinut allanut ilaasortanngornissara, Tillie Martinussen oqarpoq.
AAMMA ATUARUK Demokraatit avissaartuuttuarsinnartut
Demokraatini ilaasortat allat marluk partiimi aamma anipput.
Poul Hansen siulliulluni maajip qaammataani tunuarpoq, qinigaaffinni marlunni ilaasortaaffeqarneq akerleralugu.
Septemberip qaammataani Inatsisartuni ilaasortaq Michael Rosing attaviitsunngorpoq, Demokraatit politikkiat isumaqatigisinnaajunnaaramiuk
