Naliliisartoq: Demokraatit immikkoorutaat ersikkunnaariartortoq

Rosingip Demokraatit politikkikkut ingerlatsinerat isornartorsiorlugu partii marlunngornermi qimappaa. 

Demokraatiujunnaartullu isornartorsiutaa Sten Lundip ilisarisinnaavaa:

- Arlalitsigut malunnarsiartornikuuvoq Demokraatit tunngavimminngaanniit illuariartortut.

AAMMA ATUARUK Nivi Olsenip raajartassiissutinik allannguinissaq illersorpaa

Politikkikkut naliliisartoq Sten Lund Qanoruumut taama oqarpoq, partiillu akiitsunik akiliisitsisarnermik aaqqissuussamik Ilanngaassivimmik tapersiinera assersuutigalugu:

- Ilanngaassivimmi takusinnaavarput inuit aningaasarsiaat suli tigutinnagit ilanngaassereernissaq. Tassa taanna liberalimik eqqarsartut tunngaviatigut akerliusutut taaneqarsinnaavoq.

Demokraatinut siulittaasup KNR-imut oqaatigaa, pisortanut akiitsut amerliartuinnartut ikilisarniarlugit Demokraatit siunnersuut taperseraat.

Siulittaasup aamma erseqqissaatigaa aaqqissuussaq akiitsoqartunuinnaq atuutissasoq.

- Nammineq akilersuisinnaanngitsut aningaasaatiminnillu aqutsisinnaanngitsut iliuuseqarfigineqartariaqarput ikiorneqarlutillu. Unalu ilanngaassivik ataasiinnaavoq tassani iliuusissani, siulittaasoq Randi Vestergaard Evaldsen oqarpoq.

AAMMA ATUARUK Michael Rosing matu matorluutigalugulu Demokraatinit tunuartoq

Politikkikkut naliliisartoq naapertorlugu partiip ammanerusumik pissuseqarnissamik eqqarsarnera aanngasilliartortoq aammalu naalakkersuisooqatigiinni peqataasarsimanini peqqutigalugu partiinit allanit immikkoorutaa ersikkunnaariartortoq.

- Saamerliunerusut talerperliunerusullu immikkuullarissutaat ajoraluartumik ersikkunnaariartorpoq, politikkikkut naliliisartoq Sten Lund oqarpoq.