Dash 8 mittarfimmi aputaajaasoqartillugu qangattartoq
- Taamaliortoqaqqusaanngilaq!
Air Greenlandip paasissutissiinermut pisortaa Kathrine H. Nathanielsen Kangerlussuarmi mittarfimmi marsip ulluisa aappaanni pisumut atatillugu taama oqarpoq.
Timmisartoq Dash 8 mittarfiup illuatungaani suli aputaajaasoqartoq Kangerlussuup mittarfianit marsip ulluisa aappaanni qangattarpoq, ilaasulli allallu ulorianartorsiortinneqanngitsut, Air Greenlandip matumani erseqqissaatigaa.
Air Greenlandip timmisartuutaanik Dash 8-mut atatillugu pisoq pinngitsoorani nalunaarusiorneqartussatut nalilerneqartoq pillugu Kathrine H. Nathanielsen taama oqarpoq.
Timmisartulli aputaajaasoqartillugu qangattaqqusaanngillat, assersuutigalugu aputaajaatit timmisartup qangattalernerani soorunami mittarfimmiissanngillat, Kangerlussuullu mittarfiani pisoq Air Greenlandip maleruagassat naapertorlugit ajutoortoqarnerani paasiniaasartunut nalunaarutigaa, suliffeqarfiullu iluani pisup sukumiisumik paasiniaaffigineqarnissaa aamma nalunaarutigalugu.
Ajutoortoqarnerani paasiniaasartut nalunaarusiaat naammassineqarpat tamanut saqqummiunneqarumaartoq, Air Greenlandip tusagassiuutinut nalunaarummi allaaseraat.
