Danskit naalakkersuisui ikiuunnerunissamut piareersimasut
Isumaginninnermut oqartussaaffik nunatta 1979-imili akisussaaffigilermagu susassaqarfimmi kalaallit qallunaallu qanimut aatsaat taama suleqatigiittoqartigaaq.
Isumaginninnermut iliuusissatut inassutit 16-it suliarineqarsimalerput, Danmarkillu aningaasaleeqataaneratigut qanimullu suleqatigineratigut 2023-p tungaanut timitalerneqartussanngorput. Meeqqat inuusuttullu atugarliortut pitsanngorsaaviginiarlugit suliniutit naammanngeriataassagaluarpata qallunaat naalakkersuisui ikiuunnerunissaminnut piareersimapput.
AAMMA ATUARUK Astrid Krag isumaginninnermi suliniutit pillugit: Iliuutsivut naammassimanngillat
Qallunaat isumaginninnermut ministeriat Astrid Krag (S) oqarpoq.
- Sulineq Martha (Abelsen aaqq.) kalaallillu isumaginninnermut aqutsisoqarfiat suleqatigalugit qanimut malinnaavigissavarput. Kalaallit naalakkersuisui ikioqqullutik saaffiginnereermatali ikiuunnissatsinnut pisussaaffeqalerpugut, taannalu aamma attatiinnassavarput, Astrid Krag KNR-imut oqarpoq.
Piffissaliussami timitaliiniartut
Meeqqat inuusuttullu sumiginnagaasut kinguaassiutitigullu atornerlunneqarsimasut ikiorniarneqarneri, taamatullu atornerluisuusut katsorsarneqartalernissaat 2023-p tungaanut naammassineqarsinnaasut taanna isumaqarpoq.
- Suliniutinut piareersarluagaareermata iluatsissasoraara. Borgmesterit, sullissisut, kattuffiillu sulianut attuumassuteqartut taavalu aamma suliamik naammassinnittussat qanimut oqaloqatigineqarnikuupput, taanna oqarpoq.
AAMMA ATUARUK MIO innersuussutit pillugit: Alloriarnertut siullertut isigaarput
Sulialli kinguneqassappata akisussaaffik annerpaaq kalaalliniittoq ministeri erseqqissaavoq.
- Suliat ataatsimut isigalugit iluatsissappata Kalaallit Nunaat tamakkerluni peqataasariaqarpoq. Meeqqat toqqissisimasumik peroriartornissaat tamatta angorusupparput, tamannali angussagaanni naalakkersuisut, atorfillit oqartussallu kisimik allannguiniarsinnaanngillat, ministeri oqarpoq.
Sullivik nutaaq inassutigigaat
Inasuutit sisamaat isumaginninnerup tunngasunik kajumissutsimik suliaqartunut pitsanngorsaasoqarnissaanut tunngavoq.
Meeqqanut tunngasunik kajumissutsimik suliaqartut suliniutaannut nuna tamakkerlugu ataqatigiissaarisussamik pilersitsisoqarnissaa ilaatigut inassutigineqarpoq. Taanna Danmarkimi aningaasaateqarfiit nunatsinni suliniutinut aningaasaleeqataarusuttunik ilaatigut attaveqaataasussamik.
Inassut nalunaarusiarlu uani atuarsinnaavat.