Danskit isumaginninnermut ministeriat meeqqat inuusuttullu ikiortariallit pillugit innersuussutinik saqqummiiartorluni Nuummiittoq
Danskit isumaginninnermut ministeriat ataasinngornerup tungaanut Nuummiissaaq.
Naalakkersuisut danskillu naalakkersuisuisa isumaqatigiinnikkut innersuussuterpaaluinik saqqummiiartorpoq. Innersuussutaat nunatsinni meeqqat inuusuttullu ikiortariallit atugaasa pitsanngorsarnissaannut tunngapput.
Danmarkip isumaginninnermut nunamullu namminermut ministereqarfia KNR-imut taama ilisimatitsivoq.
AAMMA ATUARUK Abelsen Kragilu atsioqatigiipput: Danskit meeqqanut inuusuttunullu tunngatillugu ikiuunnissaat qulakkeerpoq
Nunatsinni nalunaarutigineqartut arfineq pingasoriaammik amerlanerusut
- Nunatsinni kinguaassiuutitigut atornerluinerit politiinut nalunaarutigineqartut Danmarkimut Savalimmiunullu sanilliullugit arfineq pingasoriaammik amerlanerupput.
- Nunatsinni meeqqanut inuusuttuaqqanullu kinguaassiuutitigut atornerluinerit nalunaarutigineqartut Tasiilami amerlanerpaapput.
- Meeqqanut 15-it inorlugit ukiulinnut kinguaassiuutitigut atoqateqarnerit 2018-imi nalunaarutigineqartut 27 procentii Tasiilamiipput, Tasiilamilu innuttaasut nunatsinni innuttaasut ataatsimut amerlassusaasa 5 procenteralugit.
Innersuussutit ingammik meeqqanut inuusuttunullu sumiginnarneqarsimasunut kinguaassiuutitigullu atornerlunneqarsimasunut tunngapput. Inersimasunut kinguaassiuutitigut atornerluisimasunut aamma suliniuteqartoqassaaq.
Innersuussutit suliniutillu tamarmik nunatsinni sumiginnaanermut kinguaassiuutitigullu atornerluinermut pitsaaliuinermik pitsanngorsaanermut iluaqutaanissaat siunertaavoq.
Tallimanngorpat saqqummiunneqassasut
Innersuussutit tusagassiortunik tallimanngorpat nalunaaqutaq qulingiluanut aggersaanermi saqqummiunneqassapput, saqqummiunneqarnerannilu Astrid Krag aamma isumaginninnermut naalakkersuisoq Martha Abelsen (Siumut) najuutissapput.
Martha Abelsenip Astrid Kragillu innersuussutit tunngavigalugit isumaqatigiissut siorna oktobarip qaammataani atsiorpaat. Astrid Krag Danmark sinnerlugu 80 millionit koruuninik meeqqat inuusuttullu ikiortariallit pillugit suliniutissanut aningaasaliiartorluni taamanikkut Nuummiippoq.
Suleqatigiiissitap, Danmarkip isumaginninnermut ministereqarfianeersunik inatsisinillu atuutsitsinermut ministereqarfianeersunik aammalu isumaginninnermut naalakkersuisoqarfimmeersunik sinniisuutitalik, suliaq tamatuma kingorna suliaraa. Innersuussutit aasaq manna saqqummiunneqarnissaat pilersaarutaajuaannarsimavoq.
Naalakkersuisut nunatsinni ilaatigut Tasiilami meeqqat ikiornissaannut Danmarkimit siorna upernaakkut ikioqqoreersullu nunarput Danmarkilu tamatumani suleqatigiilerput.
Tamanna DR-ip isiginnaagassiaata, “Byen hvor børn forsvinder”-ip, Tasiilami meeqqat inuusuttullu atugarliungaatsiarnerannik takutitsisup, aallakaatinneqareersorlu pivoq.
Astrid Krag ataasinngornerup tungaanut Nuummiissaaq. Nakuusa, Kofoeds Skole, Meeqqat Illuat pinerluuteqarsimasunullu inissiisarfik pulaagassaasa ilagaat. Tamatuma saniatigut Qooqqunut aamma aalisariassaaq.
