Danskit issittumi ilisimatusarnermut iliuusissatut pilersaarusiortut
Pilersaarusiaq Issittumi silap pissusia, avatangiisit, uumasoqassasuseq teknikkilu pillugit Danmarkip ilisimatusarnerata avammut nitttarsaanneqarnissaa ilaatigut anguniagaavoq.
Danmarkimi Kalaallit Nunaannilu ilinniarfiit akornanni qanimut suleqatigiittoqartariaqartoq iliuusissatut pilersaarusiami allaaserineqarpoq. Ilisimatusarfiup assersuutigalugu pinngortitamik ilisimatusarnermut immikkoortortaqarfeqalernissaa pilersaarutaavoq. Danmarks Tekniske Universitetip, DTU-p, issittumi ingeniørinngornianik amerlanerusunik tigusisalernissaa aamma pilersaarutaavoq, soorlu aamma Danmarkimi ilisimatusarfiit allat Issittumut tunngasunik amerlanerusunik pikkorissartitsisalersinnaanissaat aamma kissaatigineqarpoq.
Ilisimatusartut nunatsinni qitiusumik inissisimaffeqalernissaat aamma pilersaarutaavoq. Pilersaarutilli piviusunngussappata, suut ilisimatusaatigineqassanersut, aningaasartuutillu amerlassusissaat nalilersorneqassaaq. Soorlu aamma Namminersorlutik Oqartussat tapersersuillunilu aningaasaleeqataanissaa piumasaqaataassasoq.
Danmarkimi naalakkersuisut Issittumi ilisimatusarnermut iliuusissatut pilersaarutaat aningaasalersornertaqanngilaq, aningaasammi allatigut nassaarineqarnissaat anguniagaavoq.
Danmarkip ilinniartitaanermut ilisimatusarnermullu ministeriata Ulla Tørnæsip iliuusissatut pilersaarut, Danmarks Tekniske Universitetimi, DTU-mi, ataatsimeersuartoqarnerani ullumi saqqummiutissavaa.
Iliuusissatut pilersaarusiaq uani atuarneqaersinnaavoq.