Erfalasorpassuarnik pisiniartoqarnissaa erfalasuliortartup neriuutigaa

Naalagaaffiup suliffeqarfiutai Nunatta Savalimmiormiullu inuiattut ullorsiorneranni erfalasulertalissappata naalagaaffiup suliffeqarfiutai erfalasunik 1000-init amerlanerusunik pisiniartariaqalissapput. Erfalasuliortartorlu maanna isumallualerpoq. Aviisi Ekstra Bladet taama allaaserisaqarpoq.

Allattoq Mads Lynge

januaarip 24-at 2016 12:02

Danmarkimi erfalasuliortartut ilaata erfalasunik amerlasuunik inniminniiffigineqarnissani maanna neriuutigaa. Aviisi ullormut saqqummersartoq Ekstra Bladet ippassaq arfininngornermi taama allaaserisaqarpoq.

Naalagaaffiummi suliffeqarfii assersuutigalugu Nunatta inuiattut ullorsiornerani erfalasulertalernissaat, Savalimmiormiullu inuiattut ullorsiorneranni erfalasulertalernissaat, ministeriunerup Lars Løkke Rasmussenip siunnersuutigaa.

Aamma atuaruk Kalaallit Savalimmiullu ullorsiorfiii naalagaaffik erfalasulersortalernissamik isumaliuuteqarpoq

Naalagaaffiup suliffeqarfii erfalasulerfinnik qassinik peqarnersut, Danmarkimi aningaasaqarnermut ministereqarfiup sapaatip-akunnerata siuliani kisitsineratigut paasiniarneqarpoq, erfalersulerfiillu katillugit 534-usut paasineqarpoq, ministeriunerullu siunnersuutaa piviusunngussaguni erfalasut 1000-init amerlanerusut taamaasillutik pisiarineqartussanngorput.

Erfalasuliortut Dahls Flagfabrikip pisiniarfiata aqutsisuata Brian Nielsenip Ekstra Bladetimut oqaatigaa Lars Løkke Rasmussenip siunnersuutaa siunnersuutitsialaasoq.

Nunalli allat erfalasuisa danskit erfalasuannut naleqqiullugit akisunerunerat taassuma erseqqissaatigaa, neqerooruteqartoqarsinnaassagunartorli aamma oqaatigalugu.