Danmarkip amerikamiut Thule pillugu kissaataat akueraa
Taama pisoqarpoq naak Danmarkip kissaatigigaluaraa, sakkutooqarfimmi aserfallatsaalineq taamaallaat kalaallit suliffeqarfiutaasa suliarisinnaassagaat.
Tamanna atuarneqarsinnaavoq, qallunaat nunanut allanut tunngasunut ministereqarfiata USA'p Københavnimi aallartitaqarfianut allagarisimasaani.
Allakkat assilineqarneri Folketingimi Kalaallit Nunaat pillugu ataatsimiititaliami nunanut allanut tunngasunut ministerip nassiuppai, Inuit Ataqatigiit Siumullu Folketingimiititaasa Pituffimmi sullissinissamut tunngasunik ministeri apeqquterpassuarnik nassiussuiffigereeraallu.
Allakkani atuarneqarsinnaavoq, Danmarkip siorna USA siunnersuuteqarfigigaa taamaallaat kalaallit suliffeqarfiutaat Pituffimmi sullisinissamut isumaqatigiissuteqarfigineqarsinnaasut.
Anguniarneqarluni sakkutooqarfik sapinngisamik annerpaamik kalaallinit pissarsiaqaataanissaa.
Danmarkilli kissaatigisani iluatsinngitsoorpaa. Akerlianik isumaqatigiissutigineqarpoq amerikamiut suliffeqarfiutaat aamma sullissinissamik neqerooruteqarsinnaasut, soorlu qanittukkut Pituffik pillugu taamaaliortoqartoq.
Tassanili piumasarineqarpoq, suliffeqarfik naalagaaffeqatigiinni nalunaarsorneqarsimassasoq, danskit aningaaseriviini kontoqarluni nunani allamiullu suliffeqarfiutaannut immikkoortortaanani.
Folketingip Kalaallit Nunaat pillugu ataatsimiititaliaanut akissummi aamma atuarneqarsinnaavoq, siuliani 2005-imi sullissisussarsiortoqarmat suliffeqarfiit qinnuteqartut akuerereerneqartarneri atorunnaarsinneqarsimasut. Tassa EU'p malittarisassai malinniarlugit; tassami qallunaat suliffeqarfiutai suliffeqarfinnut allanut EU-miittunut naleqqiullugit salliutinneqartussaanngimmata.
Nunanut allanut tunngasunut ministeri Pituffik pillugu decembarip tallimaanni isumasioqatigiinnissamut aggersaasimavoq.