Danmarkimi ministerit nutaat pingasut

Ilinniartitaanermut ilisimatusarnermullu ministeri nutaaq tassaavoq Tommy Ahlers, Folketingimi ullumi ilaasortaanngitsoq. Taassuma Søren Pind, Venstremeersoq, ministeritut taarserpaa. Søren Pindip politikkimit tunuarnini ippassaq nalunaarutigaa.

Siornatigut ministeriusimasoq, Folketingimullu ilaasortaasimasoq Eva Kjer Hansen, aalisarnermut, naligiissitaanermut nunanillu avannarlernik suleqateqarnermut ministerinngorpoq.

AAMMA ATUARUK Løkke ministerinik nikititerilersoq

Naligiissitaanermut, Aalisarnermut nunanillu avannarlernik suleqateqarnermut maannamut ministeriusoq Karen Ellemann ministeritut aamma tunuarpoq.

Taassuma aqqaluaa Jakob Ellemann-Jensen, Folketingimut aamma ilaasortaasoq, aamma ministerinngorpoq. Tassa Jakob Ellemann-Jensen, avatangiisinut inuussutissanullu ministerinngorami. Parteeqataami Esben Lunde Larsen ministeritut ippassaq aamma tunuarniuteqarpoq.

Karen Ellemannip partiip Folketingimi gruppiani arnani siullersaalluni siulittaasunngortinneqarnissaa ministeriunerup Venstremut kaammattuutigaa. Søren Gadep Folketingimut qinigassanngorteqqinnani Europaparlamentimut qinigassanngortinniarnera tamatumunnga pissutaasoq, Løkkep ilisarititsinermini oqaatigaa.