Danmarkimi Ilulissat kangerluatut nunarsuarmioqatigiinnut eriagisassanngortitsisoqartoq
Danmarkimi Stevns Klintip Vadehavillu nunarsuarmioqatigiinnut eriagisassanngortitanut allattorsimaffimmut ilanngunneqarnerat Unescop nunarsuarmioqatigiinnut eriagisassanngortitanut komiteata nalunaarutigeqqammerpaa. Tamanna komitep Qatarimi ataatsimiinnerani aalajangiiffigineqarpoq.
UNESCO-p nunarsuarmioqatigiinnut eriagisassanngortitanut komiteata Stevns Klintip immikkuullarissuuneranik naqissusiinera tulluusimaarutigaara. Minnerunngitsumillu aamma Danmarkip nunarsuarmioqatigiinnut eriagisassanngortitanut kingumut tunniussaqaqqimmat, taamaaliornikkummi nunat killeqarfii pitarlugit ataqatigiissitsisinnaagatta, Danmarkimi kultureqarnermut ministeri Marianne Jelved taama oqarpoq.
Danmarkimi avatangiisinut ministerip Vadehavip allattorsimaffimmut ilanngunneqarnera aamma nuannaarutigaa.
- Danmarkimi pinngortitami sumiiffinnik siullerpaamik nunarsuarmioqatigiinnut eriagisassanngortitsisoqarpoq. Vadehavip nunarsuarmioqatigiinnut eriagisassanngortinneqarneratigut nunarsuarmi tamanit takoriarneqartaleratarsinnaavoq, Vadehavilu pinngortitamik immikkuullarissumik misigisaqarfissatut Tyskland Hollandilu peqatigalugit nunarusaq tamakkerlugu nittarsaassinnaanngorparput, Kirsten Brosbøl oqarpoq.
Stevns Klint tassaavoq ippik qaamasoq marrarmik saattumik taartumik qallersimasoq. Nunarsuup ulloriaaqqamit angalasumit ukiut 66 millionit matuma siorna eqqorneqarnerata oqaluttuassartaa marrami nassaarineqarsinnaavoq. Taamaani uumassusillit affaat, soorlu dinosaurit nungutaapput. Vadehavi ulittarnera tinittarneralu ataqatigiilluinnartuupput uumassullu naasullu 10.000-init amerlanerullutik.
Sumiiffiit taakku marluk nunarsuarmioqatigiinnut eriagisassanngortinneqarnissaat danskit oqartussaasuisa ukiuni qulikkuutaani arlalinni sulissutigisimavaat.
Ilulissani Kangia, sumiiffiillu allattorsimaffimmut ilannguneqartut nutaat saniatigut aamma Jelling, Roskilde Domkirke aamma Kronborg Slot Unescop nunarsuarmioqatigiinnut eriagisassanngortitanut allattorsimaffianiipput. Nunarsuaq tamakkerlugu sumiiffiit 1000-it Unescop nunarsuarmioqatigiinnut eriagisassanngortitanut allattorsimaffianiipput.
