Carl Holst sulinngiffeqalersoq
Partii Venstre tusagassiorfinnut nalunaaruteqarluni taama allappoq.
Carl Holst Region Syddanmarkimit ippassaq ataasinngornermi politiinut unnerluutigineqarnermi kingorna taama qinnuteqaateqarpoq. Carl Holst Regionsrådimi siulittaasuunermini inatsisinik unioqqutitsilluni pisortat aningaasaataannik atornerluisimanersoq Regionsrådip misissortikkusuppaa. Eqqartuussissuserisup misissuinerani siusinnerusukkut tamanna tikkuarneqarsimavoq.
Tamannalu aammalu siornatigut isornartorsiorneqarsimanini pissutigalugu Folketingimit sulinngiffeqarallarnissaminik qinnuteqaateqarniarluni Carl Holstip toqqarpaa.
- Qaammatit kingulliit ilungersunarsimapput. Eqqissiviilliuutaanera uannut partiinnullu akornutaaginnarani aamma qaniginerpaasannut sunniuteqarpoq, tusagassiorfinnut nalunaarummi taama allappoq.
- Ilaquttama taama inissisimatilernerinut uanga nammineq pisuuvunga, taamaammat aamma uanga akisussaaffigaara taamatut inissisimalernerat iluarseqqissallugu. Taamaammat ilaquttakka uangalu pillugit sulinngiffeqarnissamik qinnuteqarniarlunga aalajangerpunga, Carl Holst taama oqarpoq.
Carl Holst siornatigut folketingimut ilaasortaasimasumit Christian Thoningimit Venstrep Jyllandip kitaani Vardemi qinigaaffianeersumit kingoraarneqassaaq.
